Mga nakalimtan sa OPM asa na?
Niadtong Dominggo, gihatagan sa ASAP og tribute ang namatay nga lead vocalist-songwriter sa iconic band nga Hotdog nga si Rene Garcia.
Pagkagabii, duna say tribute ang RJ (Ramon Jacinto) TV sa cable, diin gipakita nila ang mga `rare video’ sa mga tukar niadto ni Rene Garcia.
Sa tinuod, daghan pa kaayong mga sikat nga Pinoy music artists sa `70s nga nakalimtan na ug tingali wa gyud mapasidunggi bisag kausa.
Sama pananglit sa folk singer nga si Florante nga maoy nagpauso sa Pinoy folk rock atol sa pag-boom sa mga AM radio niadtong 70s.
Hangtod karon wa pa man gihapon ni mawa ang mga kanta ni Florante, sama sa “Handog” ug “Ako’y Isang Pinoy.”
Si Florante sad ang nagpasikat anang “Abakada,” “Digmaan” (War) ug “Pinay” nga tipik sa Manila sound. Mas una pa ni siyang nisikat kay ni Freddie Aguilar ug Heber Bartolome. Apan ngano wa man gyud ni siya mapasidunggi sa OPM?
ICONIC BANDS
Naa pa’y laing iconic bands nga nakalimtan na, ang “Cinderella” ug ang “Wadab”.
Wa gyud ko kahinumdom nga dunay organisasyon o programa sa TV karon nga nakahunahuna og hatag ani nila og recognition.
Daghan kaayo’g sikat nga kanta ang Cinderella, sama sa “T.L. Ako Sa’yo”, “Bato sa Buhangin”, “Sa Aking Pag-iisa”, “Superstar ng Buhay Ko” ug Ang “Boyfriend kong Baduy”.
Ang “Wadab” mao sad ni ang nailang Pinoy Stylistics sa `70s tungod sa falsetto nilang mga kanta, sama sa “Pag Tumatagal Lalong Tumitibay”, “Iniibig Kita”, “Ang Jeepney”, “Tsismis Ka” ug uban pa.
Ang uban ani nila dako pang buhi, ngano di man nila i-guest sa TV? Siguradong daghan sa mga baby boomers ang maka-relate ug bisan ang mga milenyal kay sikat man gihapon ni ilang mga kanta.
Dili na lang unta paabuton nga matigok ni sila una pa nila hatagan og tribute.
OPM SA `70S
Naa pa’y daghan nga nakalimtan na, sama sa Friction band (nagpasikat sa kantang Perwisyo sa Lipunan), Soul Jugglers (Hanggang Magdamag) , Advisors (Yugyugan Na), Singsing (Oh Babe), Nailclippers (Gloria), ug The Flippers (Pangako). Duna sa’y mga artista ang nisikat niadtong 1970s sa recording, sama nilang Cherrie Gil sa iyang “Boy (I Love You)” ug Dina Bonnevie sa “Bakit Ba Ganyan”. Apan wa na lang masundi.
Subo kaayo palandungon ba nga karong panahona mas daghan pa hinuong nabuang sa K-Pop kaysa kaugalingon natong musika. Di ba?