You’re a part of me
MIINOM ko sa akong mineral water. Mitungab sab si Nestor sa tubig sa iyang mineral bottle. Unya mipadayon mig kaon og sitsirya. Sukad sa bata pa mi paborito na namo kining pagkaona ug hangtod karon nga nagtungha na mi sa college.
Nagtapad mig yaka si Nestor sa Bermuda sa among lawn. Silingan ra kaayo mi ug kanunay mag-anhian si Nestor sa amo labi nag gabii parehas karon. Childhood friend ming duha.
“Maayo kay misugot sila si Papa ug Mama, Len.”
“Bitaw, Nes. Mao sab ang akong parents. Di ta nila mapugos, di ba? Nakasabot sila nga di diay kamandaran ug kabut-an ang kasingkasing sa tawo.”
Nag-aper mi si Nestor ug unya nagpahiyomay mi. “Kahayag sa buwan, no, Nes.” “Full moon man gud ron, Len.” “Nakahinumdom ka pa ba nga kon hayag ang buwan kaniadto sa bata pa ta, magduwa-duwa ta sa inyong lawn, o kaha dinhi sa among lawn?”
“Di ko kalimot ana, uy, Lenlen, kay magtabisay man ang imong sip-on.”
Kusog nga mikatawa si Nestor. Gisigahan ko siya sa mata. Gikusi ko siya sa iyang kilid. Da, nakatig-ik lagi kay gikusog ko siya sa pagkusi.
“Kasugsogan gyud nimo, uy, Nestor. Ikaw sab, mora kag kawayan nga nagtarugsoy lang tungod kay daot kaayo ka.” Mikatawa sab kog kusog. “Pero karon macho na.” “Bitaw. Sige man gud kag workout. Ug ako, guwapa ug nindot na sab og lawas.”
“Bitaw. Daga ka na man gud. Makamao nang mangarte ug moatiman sa kaugalingon.”
Miseryuso ko. Miseryuso sab si Nestor. Nagkuptanay mi sa kamot. Maoy gusto sa tagsatagsa namo ka mga ginikanan nga magkarelasyon mi, nga magkahinigugmaay mi. Kana bang gitawag sa karaan nga buya.
Ang among mga ginikanan ang nagbuot sa among lovelife. Gipaundayonan namo ni Nestor ang ilang gusto. Nagkahinigugmaay mi. Apan among nasuta ni Nestor nga di pa mi andam sa maong seryusong sitwasyon. Labaw na nga among nasuta nga wa mi gibating love sa usag usa. Gisuginlan namo ang tagsa-tagsa namo ka mga ginikanan sa among gibati ni Nestor sa usag usa.
Nakasabot sila, ug gihatagan mi si Nestor og freedom nga makigrelasyon og laing binuhat agad sa pinitik sa among kasingkasing.