PANTHERS 4-0 ANG TUYO VS. JAGUARS

Mga duwa karon (Seniors) 4:15 pm- USC batok UV 6:45 pm- USPF batok USJ-R

Angkunon og suway sa University of Southern Philippines Foundation (USPF) Panthers ang solong liderato sa ilang pagpakigbatok sa University of San Jose Recoletos (USJ-R) Jaguars sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.

Ang Panthers ni coach Alan Cabatingan nagtagamtam sa labing maayo nilang sinugdanan sa liga diin nakarehistro sila og tulo ka sunodsunod nga kadaugan sa samang gidaghanon nga mga duwa.

Kasamtangang nakigbahin ang Panthers sa liderato sa University of Cebu (UC) Webmasters, nga sama kanila naggunit sab og 3-0 nga rekord.

Grabe ka impresibo ang gipakita sa Panthers sa nag-una nilang tulo ka mga tahas diin ilang gipakaging ang tulo sa upat ka respetadong mga puwersa nga nakapanag-iya na’g mga korona sa liga.

Unang gipangpukan sa Panthers ang two-time champions Southwestern University (SWU) Cobras, 6259, niadtong Agusto 28.

Gisundan kini sa Panthers og laing makapakurat nga kadaugan batok sa 12-time ug defending champions University of the Visayas (UV) Green Lancers, 81-80, niadtong Agusto 30.

Dayon sunod nga gipakuratan sa Panthers mao ang one-time champions University of San Carlos (USC) Warriors, 79-71, niadtong Septiyembre 2.

Labing seguro, sangko sa laingit ang kataas sa moral sa Panthers ug mao kini ang labing lig-on nilang hinagiban sa pagpakigbatok sa Jaguars, nga usa sa gikahadlukang mga puwersa sa liga.

Ang Jaguars ni coach Leodie Garcia kasamtangang naggunit og 2-1 nga rekord.

Gipangbiktima sa Jaguars ang Green Lancers, 89-73, Cebu Institute of Technology University (CITU) Wildcats, 90-69, apan napilde sila batok sa UC Webmasters, 64-72.

Ang Panthers, sama sa naandan, magsalig og maayo nila ni Rodelio Cauba, Karl Marvin Langahin, Alje Mendez, Randy Sarahina, Cris Yap ug import Rich Managor.

Sa ilang bahin, ang Jaguars mosandig sa abilidad nila ni MVP Jaybie Mantilla, Ricky Peromingan, John Ubalde, Jan Mangaron, Ralph Dinolan, Miguel Gastador ug import Tochukwu Ewenike.

Sa premirong duwa, magsangka ang Green Lancers ug Warriors.

Human sila nasubhan og kapildihan batok sa Jaguars ug Panthers, ang Green Lancers ni coach Gary Cortes namungot sa Wildcats, 98-69, aron irehistro ang labing una nilang daog sa torneyo.

Ang Warriors ni coach Bong Abad, nga gikan sa 66-56 nga kadaugan batok sa Cobras, naggunit og 2-1 nga rekord.