PACQUIAO-KHAN FIGHT MADAYON?
Miamag ang poruhan kabahin sa pangandoy ni British boxing star Amir Khan nga iyang ikaharong ang Pambansang Kamao sa Pilipinas nga si Manny Pacquiao.
Kini human gidispatsar ni Khan si Colombian Samuel Vargas pinaagi sa dominanteng unanimous decision nga kadaugan kagahapon sa Birmingham, England.
Kaduha gitumba ni Khan si Vargas nga nagsilbe niyang agianan aron iyang malubong si Vargas sa scorecards sa judges, 119-108, 119-108 ug 118-110.
Apan miagi sab og pagpanghudlat si Khan una niya nalupig si Vargas.
Gitumba ni Khan si Vargas sa sayong bahin sa 2nd round apan sa ulahing bahin sa round, nakabawos si Vargas sa pagtumba kang Khan.
Nasayod nga kinahanglan niyang modaog ning awaya aron makabaton og mas dako pang away sa sunod niyang tahas, gitumba og balik ni Khan si Vargas sa 3rd round.
Human niini, nadominar na’g sugod ni Khan ang away hangtod na sa katapusang gutlo.
Malipayon ra sab si Khan nga niabot sa tumoy ang away kay mao kini ang iyang gikinahanglan hilabi na nga taodtaod na sab siyang wala nakaaway.
“I really wanted to go the distance,” matod ni Khan sa interbyu sa ESPN.
“It’s been three years since I went 12 rounds. There were a couple of times when I could have stopped him and I kind of stepped off him.”
Nanghinaot si Khan nga madayon na ang ilang away ni Pacquiao karong Disyembre.
Sa sayo pa, si Pacquiao nipabuhagay na sab daan nga tinguha niyang moaway og balik karon sab Disyembre.
Aduna pa man tuod laing bantugang mga boksidor nga puwedeng kontrahon si Khan apan si Pacquiao gyud ang gusto niining awayon.
“Pacquiao is an amazing name in boxing,” batbat ni Khan. “I want to fight by the end of the year; 147 pounds is the division. I want Manny Pacquiao, Manny Pacquiao is my No. 1 pick.”
Si Khan misaka sa 33-4, 20KOs nga rekord samtang si Vargas nahagbong sa 29-4-2, 14 KOs nga baraha.