Deed of absolute sale alang sa CICC giandam na sa Kapitolyo

Naandam na sa Kapitolyo ang draft deed of absolute sale sa Cebu International Convention Center (CICC), subay sa pagpalit sa kagamhanan sa siyudad sa Mandaue niini.

Kinahanglan pa hinuon kini aprubahan ni Gob. Hilario Davide III ug kinahanglan pa usab siya makakuha ug awtoridad gikan sa Hunta Probinsiyal alang sa pagpirma niini.

Ang Mandaue City Government nahuman na sa pagbayad sa P300 milyones nga kantidad sa ilang pagpalit sa maong propreidad.

Matod ni Provincial Legal Officer Orvi Ortega nga naindurso na sa iyang opisina ngadto kang Davide ang dokumento ug kinahanglan pa kining mabasa ug maaprubahan sa gobernador alang usab sa hingpit nga pag-indorso niini ngadto sa Provincial Board.

Ang Hunta Probinsiyal kinahanglang mohatag una ug awtoridad kang Davide aron pagpirma sa deed of absolute sale.

Wa pa hinuon mabalik ang gobernador gikan sa opisyal nga biyahe niini sa nasud sa China.

Wa pay schedule kanus-a hingpit nga matugyan ngadto sa Mandaue City government ang deed of absolute sale.

Sa higayon nga mahitabo na kini, mahingpit na ang pagpanag-iya sa siyudad sa maong property.

Kon mo-take over na ang Mandaue sa ilang pagpanag-iya sa CICC, gipadayag ni Ortega nga i-pullout na usab sa Kapitolyo ang mga butang ug mga gwardiya nga iya sa provincial government nga anaa pa sa maong edipisyo.

Ang CICC karon gitinguha nga tukoran sa gitawag nga Infinite City diin gitumbok nga liboan sa mga trabaho ang mahatag niini.