Sirad-an ang U-turn slot sa viaduct sa South Coastal road karong Sabado
Temporaryong tak-upan sa Cebu City Transportation Office (CCTO) alang sa paghatag og higayon sa contractor sa Department of Public Works and Highways (DPWH) nga tarungon ang naguba nga parte sa U-Turn slot ubos sa viaduct sa Cebu South Coastal Road (CSCR).
Si Francisco “Isko” Ouano, operation head sa CCTO, nagkanayon nga sugdan og sira ang U-turn slot karong Septiyembre 14 nga sugod alas 12:01 sa tungang gabii adlaw na nga Sabado diin gitinguha nga maagian na usab og balik ang dapit alas 5:00 sa kadlawon karong Lunes, Septiyembre 17).
Matod ni Ouano nga nihangyo ang DPWH 7 sa ilang buhatan aron mahatagan na nila og alibyo ang problema samtang di pa modako diin adunay ibutang ang contractor aron molig-on pa ang foundation sa U-Turn slot nga aduna nay mga liki.
Ang mga sakyanan gikan sa Talisay City nga molagbas sa CSCR giabisohan nga mo-left turn sa dalan Vestil (unahan sa SM Seaside City) sanglit ablihan ug kuhaon una sa CCTO ang mga railing nga ilang giatang.
Ang mga sakyanan nga mopaingon sa Plaza Independencia ug North Reclamation Area mosubay ra gihapon sila sa normal nga rota didto sa viaduct ug mahimo sab silang moagi sa tunnel.
Si Ouano nagkanayon nga human sa pag-ayo sa U-Turn slot, ila ra usab ibalik ang railings diin ang CCTO adunay ibutang nga tag tulo ka enforcer sa tulo sa shift sa maong mga adlaw.
Gitug-an ni Ouano nga ilang gitumong sa adlaw nga Sabado ug Dominggo ang pag-repair sanglit minus ang volume sa mga sakyanan sa weekends itandi sa adlaw ting-eskwela ug tingtrabaho.
Kon makasinati og kahuot sa dagan sa mga sakyanna, iyang giawhag ang publiko sa paglugway sa ilang pasyensya sanglit ang gibuhat sa gobiyerno mao ang kaayohan alang sa publiko.