Traffic enforcer nga nag-viral gitaktak
Giaprobahan ni Mandaue City Mayor Luigi Quisumbing ang rekomendasyon sa usa ka traffic enforcer nga nag-viral sa social media tungod sa wa paghatag og gibug-aton sa reklamo sa usa ka-motorista.
Nahukman nga di na makapadayon sa iyang serbisyo ang traffic enforcer nga si Reynaldo Neri tungod sa kalapasan nga nabuhat niini isip usa ka traffic enforcer sa dakbayan sa Mandaue tungod sa wala paghatag niini sa tukmang violation nga dapat gihatag sa usa ka container van nga nagdagan bisan sa kakuwang sa ligid sa likod nga bahin ug sa gipakita nga pamatasan niini sa nagkuha sa video.
Matud ni Glen Antigua sa Traffic Enforcement Agency of Mandaue (TEAM) ilang gihatagan og due process ug gi-imbestigahan nila ang insidente bisan nga naklaro na nila sa video kun unsay sayop nga nabuhat niini.
Dugang ni Antigua nga dapat kahibawo na siya sa ilang palisiya tungod kay 13 ka tuig na kini nagserbisyo isip usa ka job order ( JO) sa TEAM.
Dugang niya nga ilang gipangutana si Neri nganung nabuhat niya ang maong butang ug ang tubag niini nahigh-blood siya niadtong mga panahona.
Si Antigua nagkanayon nga dapat tarungon sa pagtagad sa mga traffic enforcer ang mga motorista nga ilang makahimamat sa kadalanan isip usa ka public servant.
Gibana-banang 10 na ka mga traffic enforcers ang gitangtang sa serbisyo sugod niadtong niadtong niaging tuig tungod sa mga kalapasan nga nabuhat.