Kamahal sa tanan

Daghang mipiyait karon tungod sa kamahal sa tanang palaliton ug serbisyo, apan ubos ang gahom sa kuwarta (peso) sa Pilipinas ning panahona. Ang inflation rate gikataho nga naa sa 6.4 percent, labing taas kon itande sa iyang silingang kanasoran sa Asya. Nagpasabot nga dugang kalisdanan sa budget sa pamilya. Gamay na lang ang imong mapalit sa dad-ong kuwarta tungod sa pagsutoy sa presyo sa mga nag-unang palaliton sa kamerkadohan karon. Kini na kaha ang hingpit nga epekto sa Tax Reform for Acceleration and Inclusion (Train) Law o Republic Act No 10963?

Si President Rodrigo Duterte niangkon sa taas nga inflation rate sa nasod atol sa iyang pakigpulong atol sa pagbisita sa Israel dili pa lang dugay. Apan ang gibasol ni Duterte mao si US President Donald Trump tungod sa pagpatuman sa daghang lakang lakip sa wala na pagpalit sa ubang produkto.

Si Sergio Ortiz-Luis, presidente sa Philippine Exporters Confederation Inc. (Philexport), nisalikway sa 6.4-percent inflation rate nga dakong hulga, apan iyang gipasabot nga ang food inflation maoy mas makalarma.

“Ang rice hindi lang tumaas, nawala pa, may bukbok pang kasama. Ang fish, there is a problem with policy, because commercial fishermen were blocked from fishing in municipal waters,” matod ni Ortiz-Luis kagahapon. Dugang ni Ortiz-LUis, ang 6.4-percent inflation rate sa Agusto normal alang sa nagmalambuong ekonomiya sama sa Pilipinas.

Apan ang Bangko Sentral ng Pilipinas nagkanayon nga ang presyo sa bugas, enerhiya ug transportasyon mao ang nagunang responsible sa mas taas sa gipaabot nga inflation sa Agusto 2018.

Unsay hinungdan o rason, ang kamatuoran nagmahal ang tanan. Walay mahimo ang debate o lalis. Kinahanglan nga magpahugtanay kita sa bakus labina sa paggasto ug dugang kakugi.