Madakop si Trillanes?
Di pa dugay nimando si Presidente Duterte nga ipaagi sa proseso ang pagdakop kang Senador Antonio Trillanes. Sa ato pa, mitahod siya sa atong mga balaod.
Ang hukom nga dakpon o di ba si Trillanes naa na sa korte nga gisang-atan karong bag-o sa aplikasyon sa warrant of arrest sa Dept. of Justice.
Sa pagsuwat niini nidangop na sad si Trillanes sa Korte Suprema pagnulo sa Presidential Proclamation 572 kay illegal. Kulbahinam ang paghuwat sa duha ka hukom.
Kay kon mag-una ang RTC sa positibong hukom madakop ang senador nga nagtago sa iyang buhatan sa senado. Kon mag-una ang Korte Suprema maluwas siya.
Kulbahinam kaayo ni Trillanes ang paghuwat. Ubanan ang pag-paabot niya unta sa pag-ampo. Wa may makuha gikan kang Duterte kon positibo ang Korte Suprema.
Gamay lang nga kahamalingka nga nasupo. Samtang kang Trillanes balik sa bilangguan magpaabot sa laing amnestiya sa lain na sab nga administrasyon.
Pabor ko nga dunay ligong mga kritiko batok sa administrasyon kay nagpasabot nga dakong buhi ang demokrasya nga naglihok sa atong nasod.
Apan kinahanglan di overboard ang atake di sagulag pamersonal nga makatandog sa pagkatawo kay mosip-ak sa ngalan ug dungog sa pamilya.
Usahay, manubra ang kang Trillanes nga duhigon sa emosyon sa kalagot ug kasuko. Morag matumban niya ang dignidad sa iyang gikaaway. Kanang moingon nga “you are mad and evil.”
Si Duterte kay tawo nasakitan. Monang nangitag paagi nga makabawos. Nalimot si Trillanes nga labing gamhanan sa nasod ang gikaaway niya.
Political persecution? Mahimong sabton nga ingon niini kay gamhanan ang nagsugo. Apan di authoritarianism kay nagsunod sa proseso si Digong.
Niadtong 60’s, si kanhi Kongresista Serging Osmena, Jr. sobrang atake ni Presidente Carlos Garcia gisuspenso sa kongreso ug gipalagpot sa partido (NP). Persecution to?