“Doble kalisod”

Kon dunay pagsaka sa presyo sa gasolina, segurado gyod nga laing bunal na sab na nga kasakit sa mga tawo. Automatic nga mosaka sab ang presyo sa tanang palitonon. Tanan momahal.

Apan lahi sa Bohol. Ngano man?

Tungod kay kon mosaka ang presyo sa gasolina sa ubang lugar, halos doble ang saka sa presyo sa Bohol. Ngano man?

Tungod kay duna na may sobra sa 2 pesos ang kamahal sa presyo sa gasolina sa Bohol kon ikomparar sa ubang lugar.

Dugay na kining maong problema.

Dugay na gireklamo sa mga katawhan ang maong sitwasyon.

Nasayod na niini ang pangagamhanan sa Bohol.

Apan walay nahimo hangtod karon.

Buyno, abtik kaayo sila mopatawag og meeting.

Abtik mo-report sa ilang gusto mahitabo aron mapuypoy ang kasuko sa mga katawhan.

Manghulga pa nga kon dili ipa-ubos ang presyo sa gasolina, ila kining i-report ngadto sa Department of Energy.

Apan hangtod karon, mahal lang gihapon ang gasolina og way nahimo ang kagamhanan niini.

Kon dili paubsan ang presyo, ilang pasudlon ang mga “independent players.”

Mao kini ang laing “hulga” sa kagamhanan sa Bohol.

Misulod man tuod ang mga “independent players” apan unsay nahitabo?

Halos parehas ra ang presyo sa gasolina sa Big 3 og sa mga “independent players.”

Buot ipasabot, misakay lang sa panahon ang mga “independent players” og walay nahimo ang maong hulga sa pangagamhanan.

Mao kini ang sitwasyon sa Bohol.

Usa ka sitwasyon nga inutil ang kagamhanan nga hatagan og solusyon.

Matod pa sa balita kaniadtong Lunes, mobalita sa nasod si PRRD Martes sa hapon.

Sa atong pagsulat niining atong lindog, wala pa mahibaw-i og unsay isulti ni PRRD.

Mao kini hinungdan nga tagna-tagna ang nahitabo kon unsa man kaha gyod ang isulti ni PRRD.

Mao kini akong tagna. Usa sa iyang hisgotan ang mahitungod sa pag-abot ni Mangkhut. Unsay nga pangandam nga himoon.

Laing topic nga iyang hisgotan mao si Antonio T kabahin sa Amnesty niini.

Laing topic nga posible hisgotan ni PRRD mao ang kamahal sa presyo sa mga palaliton.

Daghan ang pagpangandam nga gihimo sa kagamhanan sa pag-abot ni Mangkhut.

Tawgon na siya og Ompong inig-sulod sa PAR.

Nindot paminawon ang maong pagpangandam.

Apan daghan gihapon ang gahi’g ulo.

Kon dunay “forced evacuation,” daghan gihapon ang dili motuman.

Ngano man? Mahadlok nga makawatan sa ilang mga kabtangan.

Wala nila hunahunaa nga makit-an ra ang mga butang, ang kinabuhi kay dili na.