Gary Valenciano gipasidunggan sa Star Awards
MANILA - Malampuson ang PMPC Star Awards For Music niadtong September 9 sa Resorts World Manila. Twice akong nag-present sa Stage, ang Rock Artist Cat ug Best Duo/ Group categories. Present naman ang mga winner kaya safe ako nga dili ako ma-edit kung ipagawas na kini sa ABS-CBN soon. Hehe.
Daghan ang nakadawat og tropeyo pero na-focus ang akong atensiyon kang Gary Valenciano nga maoy recipient karong tuiga sa Levi Celerio Lifetime Achievement Award.
Medyo taas-taas ang speech ni Gary nga iya lang nga gibasa sa iyang cellphone. Wala siya’y samin so ibig sabihin, bisan og dugay nang panahon nga diabetic si Gary ug pipila na ka higayon nga naospital ug naoperahan pero wala maapektohi ang iyang panan-aw.
Nagpasalamat siya sa Diyos tungod kay tanan niyang nahiaguman ilabi na sa iyang sakit ug ang mga operasyon, namalampuson tanan, aduna jud kuno’y milagro.
Mas naging madamdamin pa ang pasidungog nga iyang nadawat tungod kay gidalitan siya og pipila ka mga kanta nilang Martin Nievera, Christian Bautista, Jed Madela ug Erik Santos.
Aba, may pasabog pa si Gary. Iyang gibungat nga aduna kuno’y bag-ong theme song ang “Ang Probinsyano” ug nag-sampol siya.
Nindot sad kini, may recall ug tiyak nga magiging household song kini pareho sa unang themesong sa Ang Probinsyano nga si Gary V sad ang nikanta.
Since adunay bag-ong theme song ang Ang Probinsyano, ang buot niining ipasabot nga molungtad pa ang maong teleserye og basin matuman ang pasiaw sa social media nga moabot kini hangtud sa tuig 2048 (30 years from now). Makita sa lay-out nga uugod-ugod na si Cardo Dalisay (Coco Martin).
Sa tanang giagian ni Gary V, kanunay nga anaa sa iyang kiliran ang iyang asawang si Angeli Pangilinan .
Pagbaba niya sa stage, iyang gihalad kang Angeli ang iyang plaque ug malipayon kaayo si Angeli sa paghatag og dakong bili sa PMPC Star Awards for Music sa iyang bana sa contribution ni Gary sa Original Pilipino Music.
Back to normal na si Gary ug sa tan-aw ko, taas-taas nga panahon pa nga madungog nato ang mga kanta ni Gary V, ug way sakit nga makapugong niini.
Congratulations, Gary! Mabuhay ka!