You’re a part of me
Niadtong gabhiona, nakatulog kog husto. Wa nay kahasol nga miabot nako. Unsaon, di na ko maghunahuna sa among relasyon ni Nestor nga way klaro. Matawag ba diay nga klaro nga ang among tagsa-tagsa man ka mga ginikanan ang nagbuot, gibuya mi nga wa man lang nila sutaa ang pintiik sa among kasingkasing kon duna ba mi pagmahal si Nestor sa usag usa?
God! Di na uso ron kanang giingong buya, uy!
Pagka buntag kay Sunday man, sayo kong nagmata. Namisibis ko sa mga tanom ko sa akong hardin nga diha sa usa ka bahin sa among lawn. Nakatan-aw ko sa pikas solar, sa lawn nila ni Nestor. Sus, nakita ko na sab siya nga nag-barbell. Dagko na kaayog braso si Nestor.
Aw, daan man nuon siyang guwapo kaniadto. Apan misamot na gyud ron kay kanunay siyang nag-workout.
Mitan-aw sab si Nestor nako, nagwara-warahay mi sa kamot. Kaswal na lang namo ang among gibuhat. Sukad pa sa among pagka bata nag-iningon na mi ani.
Pagka hapon, nagkuyog mi si Nestor sa pagpanimba. Every hapon man gyud mi manimba kon Domingo. Unya may miduol namong babaye dihang nanggawas na mi sa simbahan. Nindot kaayog smile ang babaye kang Nestor. “Hi! Nes!”
Mikidhat ang babaye kang Nestor.
“Hello!”
Mikidhat sab si Nestor sa babaye nga ang ngalan diay Yol.
Gipaila-ila mi ni Nestor si Yol sa usag usa. “Guwapa si Yol, no, Len?” Naglakaw na mi si Nestor niadtong tungora sa sidewalk. Wa na si Yol.
“Guwapa bitaw.” Mipakibo ko sa akong mga abaga. “Naibog ka niya?”
“Well, way laki nga di makagusto kang Yol. Gikaila ko siya sa eskuwelahan. Nagkadungan mig esnak niadtong higayona sa school canteen. Dasig siyang pagka babaye.” Miyangu-yango ko.
“So, naigo gyud ka sa pana ni Kupido, di ba?”
“Mao lagi, uy. Na-in-love ko niya. Unsay tan-aw mo niya? I mean, kasaligan ba siyang pagka babaye kon magkahinigugmaay mi?” Nangigham ko.
“You know, Nes, di ko kinaiya ang pagpamantay, ang pagkomentaryo sa akong isig katawo kon unsa man siya, kon kinsa man siya. Pero kay nangutana ka man nako, well, sultihan tika sa akong nakita anang Yol. Di siya kasaligan.”
Wa makatingog dayon si Nestor.