HIGANTE SA IRAN PROBLEMA SA RP
Andam nang mosagubang si Raymond Almazan sa usa ka dakong tahas sa iyang pagduwa sa Team Pilipinas sa laing tipik sa FIBA World Cup Asian qualifiers.
Ang iyang misyon: depensaan ang 7’2” nga higante sa Iran nga si Hamed Haddadi.
Gumikan kay wala pa’y kaseguroan nga makaduwa sa Team Pilipinas nga si 7-footer Greg Slaughter, kinsa adunay angol sa tiil, posibleng pasanon ni Almazan ang labing dakong trabaho sa pagpugong kang Haddadi sa ilawom nga bahin.
Andam man tuod si Almazan apan sayod siyang dili kini sayon.
“Oo mabigat (na bantayan). Nakikita ko sa tape at scouting reports namin. So kailangan pagdating doon mag-extra buhat at mag-extra kain,” matod ni Almazan sa interbyu sa Spin.ph.
Nakaduwa na man tuod siya sa national team kaniadto apan mao kini ang labing unang higayon nga ikaharong ni Almazan si Haddadi, kinsa kanhi magduduwa sa National Basketball Association (NBA).
“So hopefully, maganda yung maipakita ko sa laro,” dugang ni Almazan.
Gipasabot ni Almazan nga giultihan na siya ug ang ubang big men sa Team Pilipinas nga sila si JP Erram, Beau Belga, Ian Sangalang, Asi Taulava, ug Christian Standhardinger nga mangandam nang daan kon dili puwede makaduwa si Slaughter.
Sa iyang bahin, nagkanayon si Standhardinger nga andam na siyang moduwa sa higayon nga makigbatok ang Team Pilipinas sa Iran ugma sa gabii.
Si Standhardinger wala nakapakaduwa sa tune-up game sa Team Pilipinas batok sa IECO Green Warriors niadtong Dominggo gumikan kay nagsakit ang tiyan niini.
“I don’t know what happened but I had like, I had to run to the toilet, I had coughing, I had headache, I had everything. So I had to sit out unfortunately,” pasabot ni Standhardinger.
Asoy ni Standhardinger, kinsa usa ka Fil-German forward, nga naulian na siya ug andam nang mokombati batok sa Iran.