Dakong hudlat sa pulitika ni Osmeña

Kon sa boxing pa, mora og gilupig si Cebu City Mayor Tomas Osmeña ning sayong mga rounds sa iyang pagpakigbikil sa mga kadagkuan sa kapulisan sa Sugbo ug ingon man sa iyang mga higpit nga kaatbang sa pulitika. Kini tungod kay pipila ka adlaw human siya latigoha og maayo ni Presidente Rodrigo Duterte sa uwahing bahin sa niaging buwan atol sa Charter Day sa dakbayan sa Mandaue, wala na man ta makadungog og tubag o mga mahait nga pulong gikan sa mayor nga miataki sa iyang mga kontra.

Sa ato pa, atoa mosampig ang presidente sa iyang mga kaatbang ug siya sayod kon unsa kini ka lisod alang kaniya ug unsay epekto niini sa iyang political career.

Aron pagpalurang sa sitwasyon giputol ni Osmeña ang inadlaw niyang press conference sa city hall ug daw sa midistansiya na usab siya sa mga media sa posibling tinguha nga malikayan niya ang dugang pang panagbikil.

Mahimong dunay laing katuyoan si Osmeña niini nga makahatag kaniya og positibong resulta, apan di nato masalikway nga sa pagkakaron nabintahaan gyud siya sa iyang mga kaatbang kon publisidad ang hisgutan.

Ning uwahi lang, dunay hugonhugon nga posibling kuhaan na usab siya og police power tungod niadtong iyang pagpagawas sa tulo ka mga piniriso sa Parian Police Station nga nadakpan nga namaligya og illegal nga butane canisters.

Gawas niini, pabilin gihapong mikatap ang mga huhungihong nga dako ang kahigayonan nga masuspenso usab siya tungod sa mga reklamo nga anaa karon sa buhatan sa presidente.

Naila man tuod kini si Osmeña sa iyang kahanas sa pulitika, apan hangtod nga dili pa siya makakabig og balik sa pagsalig sa presidente, posibling mao kini makapatidlom kaniya sa umaabot nga eleksiyon.