3 KA SAGUNSONG DAOG TUYO SA UV
Mga duwa karon
5:15 pm- UC batok CITU (srs)
6:45 pm- UV batok SWU (srs)
Human sa mangil-ad nilang pagsugod sa 2018 Cebu Schools Athletic Foundation Inc. (CESAFI) basketball event, ang defending back-to-back champions University of the Visayas (UV) Green Lancers nahibalik na sa naandan nilang gimbuhaton – paghakot og kadaugan.
Sa main game karong gabii, suwayan pagposte sa Green Lancers ni coach Gary Cortes ang ikatulo nilang sunodsunod nga kadaugan sa ilang pagpakigbatok sa nagkagidlay nga Southwestern University (SWU) Cobras sa Cebu Coliseum.
Ang Green Lancers nabunyagan og surpresang lubong nga kapildihan batok sa University of San Jose Recoletos (USJ-R) Jaguars, 89-73, niadtong Agusto 26.
Unya nasundan pa kini og laing makapakurat nga kapildihan batok sa University of Southern Philippines Foundation (USPF) Panthers, 81-80, niadtong Agusto 30.
Sa kasaysayan sa liga, mao kini ang labing unang higayon nga nakaangkon og kapildihan ang Green Lancers sa nag-una nilang duha ka mga tahas. Mao sab kini ang lahing unang higayon nga napilde sila sa Panthers.
Hinuon human niini, namungot ang Green Lancers ug ilang gipanglubong og taga liog ang Cebu Institute of Technology University (CITU) Wildcats, 98-69, niadtong Septiyembre 1.
Unya niadto lang Martes, laing kadaugan ang namugna sa Green Lancers batok sa University of San Carlos (USC) Warriors, 73-69, aron isaka ang ilang rekord sa 2-2 ug paamagon og balik ang ilang tinguha alang sa laing Grandslam title.
Batok sa Cobras ni coach Mike Reyes, makonsiderar nga dakong inilog ang Green Lancers apan kon molugak ang ilang duwa sa nag-una nilang duha ka mga tahas, puwede kining mapahimuslan sa Cobras.
Human sila nabunyagan og dakong kadaugan batok sa Widlcats, 87-53, niadtong Agusto 25 atol sa pagsugod sa torneyo, nagsalimoang na ang Cobras ug nakatilaw sila’g sunodsunod nga kapildihan lakip na niini ang 47 puntos nga pagkalubong batok sa Jaguars, 105-58.
Sa laing bahin, pahugtan og suway sa University of Cebu (UC) Webmasters ang ilang paggunit sa solong liderato sa ilang pagpakigsangka sa Wildcats sa premirong duwa.
Basi sa ilang dagkong kadaugan batok sa Warriors, Jaguars ug Cobras, gilaumang modominar na sab ang Webmasters batok sa nagsalimoang nga Wildcats, nga wala pa’y daog sulod sa upat ka mga duwa.