17 anyos makalima na ‘gi-rape’ sa higala sa papa

Menor nga dalaga wa na makaagwanta, nisumbong sa giingong pagpang-rape og makalima ka mga higayon kaniya sa higala sa iyang amahan.

Niadtong miaging adlaw, nakabaton na siya og kaisog, iyang gisumbong ang katapusang gihimo sa suspek kaniya niadtong gabii sa Septiyembre 13 sa bakanteng luna sa Barangay Pooc, lungsod sa Sante Fe, isla sa Bantayan, Sugbo.

Gisikop ang suspek nga giilang si Allan Ofril, alyas “Gringgo”, 30, trabahante sa airport sa lungsod.

Ang biktima nga si Shena (di tinuod nga ngan) nisumbong nga 14 anyos pa siya dihang unang gihilabtan sa suspek.

Matod ni PO1 Elmira Villareguez sa Sante Fe Police Station nga niadtong 14 anyos pa si Shena giingong gi-rape na ni Ofril, apan wa nisumbong sa iyang mga ginikanan tungod sa kahadlok.

Nilabay ang usa ka tuig, nidesisyon si Shena nga mosulod sa usa ka relihiyusong pundok aron mangita og kahupayan sa nahitabo kaniya.

Didto na niya nakaila ang usa ka pastor, kinsa iyang gisumbongan bag-ohay lang usab sa gibuhat sa suspek kaniya.

Si Shena nisulti sa kapulisan nga ang ni rape kaniya higala sa iyang amahan nga tig-adtuan sa ilang panimalay.

Ingon pa sa biktima nga bitaron siya ni Ofril ug dad-on sa bakante nga lote nga adunay labong nga mga sagbot ug didto buhaton ang pagpang rape kaniya.

Giadto sa kapulisan si Ofril sa airport kuyog ug ni Shena, kinsa gikuyogan usab sa Women and Children Protection Desk (WCPD).

Giubanan usab siya sa iyang amahan ug pastor.