Hawod ba ang Ceres?
Gipahibalo sa Vallacar Transit nga maoy nag-operate sa Ceres Bus Line nga mopaumento sila sa ilang plitehan sugod niadtong September 14. Ang pahibalo igo lang nilang gipapilit sa ilang units ug sa terminal. Pero wala gani nila pahibaw-a ang mga opisyal sa terminal. Ang Ceres Bus Line maoy usa sa pinakadako nga kompaniya sa transportasyon lukop nasud. Ma-abot ang ilang operasyon sa Luzon, Visayas ug Mindanao. Taga Bacolod ang tagiya niini. Sa ilang notisya, wala gipahibalo sa management kon pila ang ilang i-umento sa ilang plitehan per kilometer. Igo lang gi-ingon nga umento.
Pangutana; Ang ilang ipahamtang nga umento aprobado ba kini sa Land Transportation Franchising and Regulatory Board (LTFTB)? Ang LTFRB maoy bugtong ahensiya sa gobiyerno nga gitahasan sa pagpahigayon og hearing ingon man pag-aprobar sa plitehan? Mi-apply ba ang maong kompaniya og petisyon ngadto sa LTFTB? Ang akong nahibaw-an wala. Busa kon wala sila mo-apply og petisyon og walay opisyal nga deklarasyon sa plitehan matag kilometer, intonsis, illegal ang gihimo sa Ceres.
Bout bang ipasabot nga nagbuot-buot lang ang maong kompaniya nga mo-umento sa ilang plitehan bisan walay pagtugot sa LTFB? Kana kon gawas lang nga ila gyud nga konbrahon ang official fare rate o matrix nga gi-aprobahan sa LTFTB pipila na ka tuig ang nakalabay. Kasagaran god sa bus companies nga nagbiyahian sa probensiya nag-under charge gumikan sa kompitisyon ug aduna usay kasabutan ang mga bus companies labi pa sa gropo sa Provincial Bus Operators Association ug kagamhanan sa lalawigan nga dili mokobra ang mga bus companies sa official fare rate nga gi-aprobahan sa LTFRB isip paghatag og gamay nga konsiderasyon sa mga sumasakay.
For example, ang opisyal nga plitehan sa Cebu-Argao P100. Ang mga bus companies mokobra lang sa mga pasaheros og P95. Okey ra na kay makabenipisyo man ang riding public. Unya kon karon ila nang kobrahon ang maong full rate, okey lang gihapon kay mao may official rate. Apan kon pananglitan ila nang gikobra ang official fare rate unya mopasaka og mo-umento sa plitehan nga sila-sila ra, aw, illegal kana.