Press Freedom Week

Taliwala sa kampanya nga malimtan sa bagong henerasyon ang atong nasinati sa panahon sa diktadurya ni Marcos, atong gipahigayon na sab ang atong kasaulogan Semana sa Kagawasan sa Prensa.

Kon sa Iningles pa, mao kini ang Press Freedom Week.

Atong gisaulog ang kadaugan sa media sa Sugbo sa pag-angkon pagbalik sa atong katungod sa Press Freedom nga gilugpitan sa diktadurya.

Taas-taas gyud tuod ang maong pakigbisog.

Naa pa ko sa elementarya dihang gipangsirad-an ang mga mantalaan, radyo ug telebisyon dihang gipahamtang sa diktador ang balaod militar.

Makahinumdom ko niana kay nawagtangan intawon og panginabuhi ang akong amahan.

Di man unta siya walhon o usa ka rebelde. Apan kay sakop sa media nga gilugpitan sa diktador aron walay mokwestyon sa iyang paghari, gikulban kami sa kun.

Sa ngadto-ngadto, gitugtan sa diktadurya ang usa ka media nga gigawngan.

Apan tingale kay balwarte sa oposisyon ang Sugbo, di malikayan nga molambo ang usa ka gawasnon nga media sa Sugbo nga maisugong giduso ug gipanalipdan sa mga sakop niini.

Di ko makalimot nga sa panahong nahimo ako nga aktibista,

Tipik sa pakigbisog batok sa diktador mao ang pagpatigbabaw sa Press Freedom.

daghan ko og masangpit nga mga sakop sa media. Motabang sila sa pagpatik ug pagsangyaw sa lain-lain namong mga baruganan sa mga motumaw nga mga isyu.

Di ko makalimot nilang anhing Job Tabada nga nagtukod mismo og mga sekretong grupo sa mga peryodista nga nagsangyaw sa kagawasan.

Kuyog siya sa pipila ka mga sakop sa media sa Sugbo nga nakigbisog alang sa kagawasan bisan pa man sa hulga nga madakpan.

Aw kinsa may makalimot kang Inday Nita Cortes-Daluz nga gawas sa iyang tingog sa kahanginan, makita sab nato siya nga mangulo sa mga protesta diha sa kadalanan.

Tipik sa pakigbisog batok sa diktador mao ang pagpatigbabaw sa Press Freedom.

Tuod man, human nahugno ang diktadurya ni Marcos, gisaulog nato kining kadaugan nga mabalik ang Kagawasan sa Prensa pinaagi sa tinuig nga Press Freedom Week.

Klaro ang kahulogan niini kay ang maong kasaulogan atong gitayming sa Septiyembre 21.

Bisan pa man, makapabalaka kining mga paninguha karon nga malimtan ang tinuod nga mga panghitabo sa atong kasaysayan.

Dihang nagkakuyog kami pipila ka adlaw sa wala pa kini mamatay tungod sa sakit pipila na ka tuig nga milabay, nagkanayon si Job Tabada nga kinahanglang batokan kining hinayhinay nga pagbalik sa mga Marcos.

Tingale, tipik niini mao ang pagpanamin nganong nagsaulog kita sa Press Freedom Week.