Di pakalitan

Adtong miaging Dominggo, duna unta koy planong motungas sa bukid pero nausab ang akong huna-huna. Instead, akong gisuwayan kon makaya ba nako ang tumang kainit sa karsada.

Instead motungas, sa patag ko nagpainit. Naa ra tingali sa mga 40 kilometros ang kinatibuk-ang travel. Gisuwayan nako ang akong endurance ubos sa grabeng kainit sa adlaw. Kaniadto man gud, kaya ra nako bisan 70 kilometros nga naglagiting ang kainit sa adlaw.

Tuod man, nibiya ko sa balay og mga 10:30 sa buntag alang sa 20 kilometros nga biyahe. Mas lisod ang pagpadung kay sagad sa akong sikaron dunay gamay nga tungas nga kaniadto usab, yano ra nako. Mao ni ang laing rota nga kalingawan nako kaniadto.

Pastilan, tuod medyo yano ra ang sugod, pero ma feel nako ang grabeng kainit kay maora nag mokayo ang akong lawas. Maora ko og nibalik sa sugod, kaniadtong bag-o pa kong nagsige og sakay sakay sa biseklita.

Instead molahos ko sa akong tuyo, niundang ko sa may usa ka mall kay di na nako makaya ang kainit. Ang timaan mao ang pagsakit sa akong ulo. Kon mosakit na gani ang ulo, angay nang mopahuway kon unsay imong gibuhat tungod kay ang ulo maoy atoang alarm that something is wrong sa atoang lawas.

PAHUWAY

Kining man gung ulo, mao ni ang pinakasentro ug pinaka importante sa atoang lawas kay sa computer pa, mao ni ang central processing unit (CPU). Di maka function ang atoang lawas kon wa ang utok. Kining labad sa ulo, kasagaran mao ang iyang alarm kon dunay di maayo sa atoang lawas. Mao ni nga bisan unsa akong buhaton , if sakit na ang akong ulo, mohunong ko.

Sagad moinom ko og tubig ug mo-relax, maminaw sa lawas. Tingali, kon nag-anad pa ko sa kainit samtang magsikad, di ko bation og ingon niadto. Sama kaniadtong bisan alas 12 sa udto, naa pa ko sa bukid. Busa, naka adjust na ang akong lawas. Apan karon man gud, wa na ko mag long ride. Sagad naa na ko sa balay mga alas 10 pasado sa buntag.

ADJUST

Ayaw pakaliti ang imong lawas. Anara una kini sa di ka pa mag long ride. Okay lang tingali kon makapahuway kag mga duha ka semana. Apan kon molanat nig pipila ka mga buwan, lisod kon pakalitan mo ang imong lawas. It can be a disaster waiting.

Kon mao pa say pagsugod nimo, ayaw atha ang lawas. Anam-anama ang ka layo ug katungason. Ayaw pakaliti ang lawas kay bisan gani ang makina, dunay gitawag og break in. Unsa na kaha ang imong lawas, di ba? Ampingi ang lawas kay niini, diha kita malipay ug malingaw.