You’re a part of me
TEEN ROMANCE
(Ikaunom sa pito ka mga gula)
Igo lang kong gihatod ni Garry sa balay. Dihang wa na siya, mihigda ko sa akong kuwarto pagkahuman kog ilis og para sa balay. Tungod kaha sa kakapoy, nakatulog ko. Gabii na sa akong pagmata. Hinuon, sayo pa ang gabii. Human kog panihapon mobalik na unta ko sa pagsulod sa akong kuwarto aron ipadayon ang pagkatulog, apan wa ko makapadayon kay nahiabot si Nestor.
Diha mi sa sala nag-estorya. Wa sila si Mama ug Papa kay nanglakaw. Nanan-aw silag sine. Ingon ani ka-loving ang akong parents. Bisag edaran na sila apan wa gyud mawala ang ilang pagmahal sa usag usa. Gihatagan gyud nilag panahon ang ilang relasyon isip magtiayon.
“Malipayon ka mang nakigkuyog kang Garry, Len. Morag gikan man mong nag-beach?”
“Nag-beach bitaw mi, Nes. Ikaw, kanunay sab nakong makita uban kang Yol sa eskol. Malipayon sab mo.”
Wa motingog si Nestor. Nakamatikod ko nga sukad sa iyang pag-abot sa balay, morag nagmagul-anon siya. Wa ko makita ang nindot niyang smile. Kanunay man gud siyang magpahiyom kon mag-estorya mi.
“Pagpakaaron-Ingnon lang to, uy, Len.”
“Unsay pagpakaaron-ingnon, Nes?”
“Ang kalipay kunohay nako kon magkuyog ug mag-estorya mi si Yol. Wa maggikan sa akong heart ang maong kalipay nga nakita mo nako, Len.”
Nakatan-aw kog maayo kang Nestor.
“Duna ka bay gitago nako, Nestor? Nganong nagpakaaron-ingnon ka man nga malipayon kunohay uban kang Yol?”
Wa ko makasabot sa akong kaugalingon. Kalit lang kong gikulbaan.
“Sige, ha, Len, mopauli na ko.” Wa ko tubaga ni Nestor. Mitindog siya ug nananghid nga mopauli na. Wa siyay lingi-lingi nga mibiya nako. Mora kog naestatuwa niadtong tungora. Nabag-ohan ko sa mga lihok ni Nestor nga iyang gipakita ron nako.
Haaay! Naunsa man si Nestor nga mikalit man lag kausab? Mipakibo na lang ko sa akong mga abaga dayon kong sulod sa akong kuwarto. Kaganina gibati ko ang katulugon. Apan naglisu-liso ko sa akong gihigdaang kama. Wa gyud ko makatulog.
Wa gyud ko makasabot sa akong kaugalingon niadtong tungora. Si Nestor ang akong mahunahuna bisag wa ko maghunahuna niya. Nahibulong ko sa akong gibati niadtong higayona. Morag dunay kalit nga kausaban sa akong pagbati. (TAPUSON SUNOD GULA)