Di na mabalik ang kagahapon

Lima na ka tuig sukad gikasal sila si Donna ug Ben. Adunay duha ka anak ang magtiayon. Kapitan sa barko si Ben nga magbiyahean sa lainlaing dapit sa Pilipinas. Tungod kay nagkadako ang ilang pamilya kulangon na ang iyang suweldo alang sa inadlaw nga gastuhanan.

“Maayo pa mo-aplay ka og overseas seaman. Agwantahon lang nato ang kamingaw,” agni ni Donna sa iyang bana.

“Ikaw god, basta atimana atong mga anak,” ni Ben. Alang sa maayong kaugmaon sa iyang mga anak nakahukom siya nga manimpalad sa gawas sa nasod.

“Ayaw mig kalimti sa imong mga anak,” ni Donna nga mihilak didto sa airport.

“Kiss ni Daddy,” ni Ben nga migakos sa iyang asawa ug duha ka anak.

Milabay ang usa ka tuig. Mibakasyon si Ben sa ilang lungsod sa Santander ug gisuroy ang iyang pamilya sa lainlaing lugar.

“Di kabayran og kuwarta ang kamingaw,” matod ni Ben ngadtong Donna.

“Mag-unsa man ang kamingaw kon walay kuwarta?” ni Donna.

Milarga si Ben human sa iyang bakasyon kay gitawgan sa shipping

agency nga gitrabahoan.

USA ka higayon nagdiskarga og mga kargamento ang gidalang barko ni Ben. Samtang misuroy sa parke gikaila niya si Helen nga usa ka domestic helper.

“Dugay na ka nagtrabaho dinhi?” matod ni Ben.

“Mga five years na. Lisod sa Pilipinas kay gamay ang suweldo,” ni Helen.

Tungod kay pareho nga Pinoy dali ra sila nga nagkasuod.

Sukad nagkaila sila si Ben ug Helen kanunay na sila nga magtawganay, hangtod nga sila nagkauyab. Kanunay sila nga manulod sa hotel.

Paghiuli ni Ben sa Pilipinas nahibulong si Donna nganong nausab ang iyang bana. Dili na kini ganahan mosuroy ug kanunay nang nagdala og selpon. Nagduda si Donna nga nakauyab kini og lain.

Usa ka adlaw gitawgan ni Helen si Ben. “Darling, nagsabak ko ug mopauli sa Pilipinas kay anha ko manganak,” ni Helen nga nabalaka sa iyang kahimtang.

“No problem. Magkita ta unya diri,” tubag ni Ben nga daling misulod sa kuwarto. Wala siya masayod nga gipanid-an siya sa hilom ni Donna. Naminaw kini sa ilang gipanag-estoryahan ni Helen.

“Pagsulti sa tinuod, kabit nimo ang imong kaestorya, no? Kon dili ka na ganahan nako sultihi ko! Nganong itago pa nimo?” ni Donna nga nasuko kaayo.

“Amiga nako,” pamakak ni Ben nga daling mi-delet sa numero ni Helen sa selpon.

Sukad nasakpan ni Donna si Ben wala nay klaro ang relasyon sa magtiayon. Milarga si Ben og balik, apan wala na mopaui sa ilang balay human sa iyang kontrata. Mikuyog siya kang Helen sa Mindanao.

Sa laing bahin nag-inusara na lang si Donna nga nag-antos sa pagpa-eskuyla sa iyang mga anak kay nahunong ang sustento ni Ben. Kay nakahuman man siya sa kursong edukasyon nakatrabaho siya sa usa ka pribadong eskuylahan.

MILABAY ang katuigan. Usa ka adlaw nahibalik si Ben sa ilang balay human gibiyaan ni Helen. “Pasayloa ko sa akong nabuhat. Pwede ibalik nato ang kagahapon?” ni Ben nga miluhod sa atubangan ni Donna.

“Kon ang Diyos makapasaylo, ako pa kaha? Pero sorry, Ben, kay di na ko makigbalik nimo!” prangka ni Donna. Mitalikod si Ben aron mobiya sa kanhi niyang panimalay.

“Mommy, kinsa imong kaestorya?” ni Vina, kamanghurang anak ni Donna.

“Amigo sa imong daddy. Ako siyang gipahibalo nga dugay nang namatay inyong amahan,” pamakak ni Donna samtang naglantaw kang Ben nga migawas sa pultahan. Mitulo ang luha ni Ben nga nakadungog sa gipamulong ni Donna.

Nasakit si Ben ug namatay. “Serado na ang akong kasingkasing. Bisan sa laing kalibutan dili na mahimo nga ibalik ang atong kagahapon!” tuaw ni Donna dihang miduaw siya sa lubnganan ni Ben. (KATAPUSAN)