3 TIPI SA BANGGA; DRIVERS HUBOG
PULOS MGA SAKAY SA 2 KA MOTOR
Kahubog sa duha ka mga drayber maoy gitumbok sa kapulisan sa panagbangga sa duha ka mga motorsiklo nga nipatay sa tulo ka mga tawo ug niangol sa laing tulo sa Sitio Roxas North, Brgy.Tabunok, lungsod sa Tabuelan, niadtong Dominggo sa gabii.
Dead on the spot ang mga driver sa duha ka motorsiklo nga sila si Avelino Palao Jr., 23, ug si Celestino Orcullo, 19, puro taga Barangay Tabunok, sa nahisgutang lungsod.
Kagahapon sa buntag, gikompirmar usab sa Tuburan District Hospital nga laing usa sa mga angkas sa duha ka motorsiklo namatay human na-comatose.
Hangtod niining pagsuwat, wa pa mahibaw-i kon kinsa kini.
Samtang ang tulo padayon pa usab nga nagpaayo sa Vicente Sotto Memorial Medical Center, diin usa sab kanila ang na-coma.
Sa imbistigasyon sa kapulisan, nawala sa kontrol ang gimaniho nga motorsiklo ni Orcullo ug mipaingon sa pikas lane hinungdan nga nakabangga kini sa motorsiklo ni Palao nga nagsubay sa atbang nga direksyon.
Si PO2 Clifford Agang, imbistigador sa Tabuelan Police station, nibutyag nga hubog ang duha ka mga driver samtang nagmaniho.
Daling gidala ang mga biktima sa Tuburan District Hospital, apan gideklara na nga patay ang duha ka mga driver samtang gibalhin dayon sa VSMMC ang upat ka mga naangol.
Ang kapulisan nakakuha sa lugar sa insidente og usa ka botelya sa makahubog nga ilimnom.
Si Tabuelan Chief of Police Emmanuel T. Rabaya niawhag sa mga driver og motorsiklo nga di mag-drive kon nakainom na sila aron malikayan ang disgrasya.
“Dont drink and drive lang gyud unya mag amping perme,” matod niya.
Giawhag usab sa hepe ang mga ginikanan sa pagbadlong sa ilang mga anak nga mga batan-on nga di mag drive og motorsiklo ilabi na kon kini nakainom na.
“Mamalihug sab ko sa mga ginikanan sa mga batan-on, nga ayaw na intawon ninyog pa-drayba ang inyong mga anak nga nakainom na,” dugang ni Rabaya. /