Daluz gisuspenso sa DILG

Gisuspenso og unom ka buwan sa Office of the Visayas Ombudsman si Konsehal Joey Daluz III gumikan sa iyang kapakyas pagpasabot sa pagsaka sa iyang personal nga kabtangan sa iyang Statement of Assets Liabilities and Networth (SALN) niadtong 2007.

Ang Department of Interior and Local Government (DILG) 7 nipatuman sa suspension kagahapon sa buntag diin ang staff ni Daluz didto sa iyang buhatan sa City Hall ang nakadawat.

Si Daluz kinsa usa ka abogado ni-question sa implementasyon sa DILG sanlgit wa pa maesolbar ang iyang giduso nga motion for reconsideration.

Nakit-an sa Ombudsman nga adunay less serious dishonesty si Daluz sanglit wa niya gipasabot kon nganong nahimong P1.029,000 ang iyang personal properties niadtong 2007 gikan sa zero value niadtong 2006.

Sa MR ni Daluz, iyang gipasabot nga nisaka ang iyang personal nga kabtangan niadtong 2007 dihang iyang nasunod ang personal property sa iyang inahan nga si Inday Nita Cortes Daluz human sa pagkamatay niini.

Sa samang tuig usab, hingpit naanular ang iyang kaminyuon ug nagbahin sila sa propiedad sa iyang kanhi asawa nga niadto gipanag-iya nilang duha.

Si Bise Mayor Edgardo Labella, kinsa kaalyado ni Daluz, niingon nga adunay pending nga MR si Daluz nga angay susihon sa Ombudsman.

Matod pa ni Labella nga angay unta nga sulbaron sa Ombudsman ang MR ni Daluz subay sa provision nga nalatid sa rules sa Ombudsman, apan lahi ang nahitabo.