Sinas sa Inayawan police station

Ang kamandoan lang sa Camp Crame ug korte ang makapugong sa Police Regional Office (PRO) sa Central Visayas sa padayong pagpatukod sa bag-ong police station sa Barangay Inayawan, siyudad sa Sugbo.

Kini sumala ni PRO 7 Director Debold Sinas dihang nibisita sa buhatan sa SunStar Cebu niadtong Sabado.

Matod niya, dili mahimo nga usa ka resolusyon lang ang makapugong sa ilang pagpatukod sa police station sanglit usa kini ka proyekto sa nasudnong kagamhanan.

“They could not just revoke katong kaniadto kasi during that time sila ang signatory and the project has been implemented. You could not just revoke a national project because ayaw mo,” padayag sa direktor.

Apan alang ni Inayawan Barangay Kapitan Kirk Bryan Repollo nga kwestyonabli ang pagkadonar sa miaging administrasyon sa luna kay way resolusyon ang konseho sa barangay nga magtugot sa kanhi kapitan nga mosud og kasabotan tali sa Philippine National Police (PNP) alang sa pagdonar sa lote nga maoy barugan sa bag-ong Presinto Siyete o naila nga Pardo Police Station.

Siya nibutyag nga dihang nakakuha sila og certified true copy sa titulo sa lote, wa maka-annotate ang deed of donation nga mao usab ang ilang gikwestyon.

Niadtong Septiyembre 4, gipasar sa konseho sa barangay ang resolusyon alang sa pag-revoke sa deed of donation ngadto sa PNP ug ang pagtugot ni Repollo sa pag-execute sa deed of revocation alang sa maong donasyon ug ang pagpanotaryo na lang niini ang kuwang human unya nila mapirmahan.

“Kami sa among part, confident man mi nga mapa-revoke na namo,” dugang ni Repollo dihang nahinabi sa Superbalita Cebu.

Si Sinas namahayag nga kon nasugdan pa og tukod ang proyekto niadtong Mayo hayan mahuman na unya kini sud sa unom ka buwan.

Ang director nipasangil ni Repollo nga namulitika hinungdan nga nalangay ang pagsugod og tukod.

“Kung naa kay problem, bring that to the court but the project will continue...Sabi ko, aha ka makakita ng isang barangay ayaw ng pulis kon hindi ka involve sa drugs,” dugang pamulong ni Sinas.

Apan depensa ni Repollo nga wa siya mamulitika kay igo lang siya naglantaw sa kaayohan sa ilang barangay diin iyang gibarugan nga makamugna og kahuot sa dagan sa trapiko ang presensiya sa police station kon madayon ang pagtukod sa maong luna.

“Actually dili na pamulitika amoa, kana sila seguro maoy namulitika kay seguro kahibawo sila nga under ko sa BOPK sad ingon ani, supporter ni Mayor Tom. So, ila nang i-associate ang pulitika, which is kami nitrabaho lang according sa unsay beneficial para sa mga tawo namo,” dugang sa kapitan.

Si Sinas ug ubang mga opisyal sa kapulisan dili maayo ang relasyon tali ni Cebu City Mayor Tomas Osmeña.

Gidugang sa director nga kon magmagahi si Repollo ila kining kasohan sa korte diin ila na usab napahibawo ang Commission on Audit kon nganong langay ang pagsugod sa proyekto.

Apan sumala sa kapitan nga mas maayo nga makaabot sa COA ang maong isyu kay andam sila moestorya kon unsay problema kabahin niini.

Si Repollo dili motuo nga ang pagtukod sa police station maoy makasulbad sa mga problema sa kahapsay ug kalinaw sa ilang barangay.

“Naa bitaw mga barangay nga naay police station, wa silay issues sa peace and order? Naa man gihapon,” dugang niini.