PAGPANINDOT ANG PANGINABUHI
Nagsugod isip usa ka assistant sa inila nga mga coordinator sa kasal, debut ug ubang dagkong mga kalihukan, si Eduardo Siton Jr., 38.
Karon, usa na siya sa mga dinayeg nga stylist/coordinator, dili lang dinh sa Sugbo kondili ingon usab sa ubang bahin sa nasod.
Kini nga panginabuhi dili lang alang sa iyang pamilya kondili nakatabang usab si Siton sa iyang mga higala nga way mga trabaho nga maoy iyang gikuha isip iyang staff.
Napukaw ang iyang interest ug talento sa pag-decorate gamit ang mga buwak ug dayandayan dihang nagtungha pa siya sa 4th high school diin siya ang nagdayan-dayan sa wedding booth atol sa intramurals sa ilang tunghaan niadtong 1997.
Nasuwayan ang iyang katakos sa decorating and styling atol sa kasal sa iyang ig-agaw nga lalake niadtong 1998.
Sa samang tuig, nahimo siya isip assistant head coordinator sa usa ka bantugan nga coordinator nga si Richie Mendoza sa Cebu Events Maker.
Nadani siya nga mosud sa industriya sa wedding and special events coordinators ug stylist dihang nasaksihan niya ang engrandeng countdown sa usa ka dakong hotel sa dakbayan sa Lapu-Lapu nga New Year’s countdown nga giandam ni Mendoza.
Matod ni Siton, gidasig usab siya ni Mendoza nga mosuway og organize og iyang kaugalingong events sama sa kasal kay nisalig kini nga kaya niyang mabuhat tungod sa iyang talento.
Nakakat-on usab og styling og mga buwak si Siton gikan ni Oscar Solon sa Orient Flower Shop.
Aron pagbaid sa iyang kahanas sa styling ug coordinating, nipaubos og training seminar si Siton gikan sa iladong stylist ug
coordinator sa kaulohan nga si Rita Neri niadtong 2007.
Si Siton gradwado sa kursong Bachelor of Science in Secondary Education apan mas naenganyo siya nga bairon pa ang iyang kahanas sa styling ug coordinating labi na dihang anam-anam nga dunay nikuha sa iyang serbisyo ug nisalig niya.
Karon, duna na siya’y kaugalingong kompaniya, ang Ed Siton Glamourosa Events and More nga bunga sa iyang paningkamot diin matag buwan dili moubos sa unom ka events ang ilang dumalaon.
Iyang giangkon nga lisod ug makuti ang maong klase sa panginabuhi kay kinahanglan nga makuha nimo ang pagsalig ug katagbawan sa mga kliyente. Isip usa ka stylist ug coordinator, siya ang mangu sa pag-decorate sa venue, pananglitan sa kasal, kinahanglan nga makauyon ang iyang kliyente sa giandam nila nga mga dekorasyon sa simbahan sama sa buwak, ang arrangement niini ug set-up sa reception area.
Kon package na, apil sa iyang andamon ang apparels, bridal gowns, bouquet nga dad-on sa babayeng kinasal, han-ayon ang entourage, pagkaon sa okasyon, ug ubang panginahanglanon sa bag-ong magtiayon.
Dugang ni Siton, kinahanglan nga lab-as, mabulukon ug dekalidad usab ang mga buwak nga gamiton, nindot ang arrangement sa mga buwak nga mohaom sa venue sa okasyon. “Para ma-win nako ang heart sa couple, from day one pa lang pangitaon na nako ang weakness sa couple ug unsay ganahan nila nga output.
Gitug-an ni Siton ang labing barato niya nga package karon kay mokabat sa P165,000 diin covered na niini ang apparels, decorations, pagkaon ug venue, pagpahulagway ug pagkuha og video sa mga kinasal ug uban nilang panginahanglan sa kalihukan.
Suma pa niini kinahanglan nga duna kay igong pasensiya, kamao mobahin sa imong oras ug dunay talento, dedikasyon ug paghimo sa maong klase sa trabaho aron molungtad ug makakuha og mga kliyente. /