Palusot Andales, Arcilla

Wa pa siguro matagbaw sa ilang serbisyo kini sila si konsehal Sisenio Andales ug Alvin Arcilla sa Cebu City kinsa nagtinguha karon nga subling magpapili sa eleksiyon sunod tuig sa mao gihapon nga posisyon bisan og mga last termer na ni sila. Ubos sa balaod nga nalatid usab sa Local Government Code, way elected government official nga makaserbisyo ug kapin sa tulo ka sunodsunod nga termino sa mao gihapon nga posisyon.

Pero bisan pa niining maong balaod, si Andales ug si Arcilla nangita og lusot.

Ilang girason mao nga nalakip sila sa gipangsuspenso niadtong May 17, 2016 tungod sa pagpanghatag sa dakbayan og financial assistance ngadto sa mga empleyado sa City Hall og tag P20,000 human sa dakong linog ug sa Bagyong Yolanda nga miigo sa pipila ka dapit sa Kabisay-an.

Ilang gilakbitan nga tungod niadto, naputol na ang ilang serbisyo ug sa ato pa dili na matawag nga sunodsunod o consecutive ang ilang paglingkod sa maong puwesto.

Ambot og kining pagkasuspenso sa elected official o officials makonsiderar ba kini nga nagputol sa ilang serbisyo nga kon buot hunahunaon wala man sila mailisi ug wala man usab hingpit nga mapapas ang ilang pagka-konsehal kay lagi temporaryo ra man ang ilang pagbakanti.

Lahi kini og sitwasyon sa ilang kauban nga si kanhi Cebu City North District councilor Augusto “Jun” Pe kinsa niadtong 2013 magpapili gihapon pagka konsehal bisan og wala na siyay term apan ning higayona ari na sa South District.

Daghang nipasaka og protesta ug gustong ipa-disqualify si Jun Pe niadtong higayona, pero nahuman na lang ang eleksiyon wa gyuy gikatubag ang taga Commission on Election (Comelec) sa rason nga sila ray nahibawo.

Hinaot ning higayona makahatag nag katinoan ang taga Comelec aron kini atong kamanaminan.