Lolypop sa Kongreso?
Tungod sa nagkainit nga panagbangi nilang Mayor Luigi Quisumbing sa Syudad sa Mandaue ug Kong. Jonas Cortes, atong gilantaw nga walay mokontra kang Lolypop Ouano-Dizon kon modagan kini sa pagka kongresista sa ikaunom nga distrito sa lalawigan sa Sugbo.
Nakita nato kini karon diha sa pagpangulitawo sa kampo ni Cortes sa mga Ouano bisan pa man sa kasuod sa naulahi sa kampo ni Quisumbing.
Dihang nakaamgo ang kampo ni Quisumbing nga seryuso ang tinguha ni Kong. Cortes nga mobalik isip mayor human sa miaging piliay sa barangay, gipang-ilisdan dayon ang mga JO ug opisyal nga nailang naa sa kampo sa kongresista.
Dayon nasulod sa City Hall ang ubay-ubay nga mga tawo nga suod sa mga Ouano. Bisan pa man, gitinguha gihapon ni Kong. Cortes nga madani sa iyang kampo ni Lolypop.
Nahimuot ko sa kahimtang sa politika sa Mandaue kay sa miaging 2016 man gud, gitabangan nilang Cortes ug Quisumbing si Lolypop mao nga napakyas ang tinguha niini nga mahimong mayor.
Apan karong nag-angat na ang deadline sa pagsang-at sa certificate of candidacy karong Oktubre 17, wa kitay nakita nga seryusong mosukol kang Lolypop isip pagka kongresista.
Hinuon, mahimo nga mosuporta ang usa kanila ni Cortes ug Quisumbing og laing kandidato. O moatras ba si Cortes sa pag-atbang kang Luigi ug magpa-reelect na lang isip kongresista.
Apan sa dagan karon sa politika sa Mandaue, klaro na man nga magsangka gyud ang Jonas ug Luigi.
Karon, atong hinumdoman nga sa miaging piliay, si Luigi nagsalig sa makinarya ni Cortes diha sa Mandaue batok sa makinarya sa mga Ouano. Apan karong si Cortes na ang iyang kaatbang, si Mayor Quisumbing nagkinahanglan sa pagpakig-alyansa sa kampo ni Lolypop Ouano-Dizon.
Tuod man, pipila ka mga barangay kapitan nga naa sa kampo sa mga Ouano nakig-alyado man ni Quisumbing sa piliay sa Association of Barangay Councils.
Apan di hingpit ang mga Ouano nga nidapig sa mayor. Usa sa mga kapitan nga Ouano loyalist didto nidapig kang Cortes. Buot ipasabot, daw nag-zona libre ang mga Ouano sa Mandaue.
Karon, nagtuo ko nga lig-on nga baraha karon ni Lolypop ang pagka swing vote sa kampo sa mga Ouano sa panagsangka nilang Cortes ug Quisumbing. Gamiton kaha kini nga baraha o dili?
Sa akong panglantaw gikan diri sa akong gilingkoran sa Mandaue, mag-agad si Lolypop kon duna bay ibutang nga kontra kaniya ang si bisan kinsa nilang Cortes ug Quisumbing.
Mahimo kining mosangat sa iyang pagka kandidato alang sa pagka kongresista unya tan-awon kon duna bay molansar nga laing kandiadto o wala.