Cabagnot, Thompson gibag-ohag kontrata

Duha ka bag-ong mga sakop sa Team Pilipinas nga sila si Alex Cabagnot ug Scottie Thompson ang mingpirma og bag-ong kontrata sa ilang tagsatagsa ka teams sa PBA.

Ang duha ka dekalidad nga guards parehong mingpirma og preskong tag tulo ka mga tuig nga kontrata sa ilang team. Si Cabagnot usa sa labing sinaligan sa San Miguel Beermen ug hasta si Thompson sa Brgy. Ginebra Gin Kings.

Human sa ilang pagpirma og bag-ong kontrata, sila si Cabagnot ug Thompson nahilakip sab sa mga gipangpili ni national coach Yeng Guiao nga molangkob sa Team Pilipinas nga nakigbatok Qatar kagabii sa Fiba World Cup Asian qualifiers sa Araneta Coliseum.

Ang kontrata ni Thompson karon pa untang human sa Governor’s Cup mapupos apan nakadesisyon ang team nga tanyagan na kini og sayo og bag-ong kontrata.

Ang kontrata ni Cabagnot, 35, inig human pa unta sa sunod season mapupos apan nakadesisyon ang San Miguel management nga sumpayan nang daan og duha ka mga tuig ang iyang kasamtangang kontrata.

Si Thompson, kinsa gipili sa Gin Kings isip 5th overall sa 2015 rookie draft, nakadaog na og tulo ka mga titulo sa matag tuig niyang pagduwa ug napili kining PBA Press Corps Finals MVP dihang gipakaging sa Gin Kings ang Beermen sa Commisssioner’s Cup.

Gihulagway siya ni Ginebra coach Tim Cone nga ‘a real special kid’ ug insaktong ehemplo sa nabantog nga kinaiya sa Gin Kings nga “never say die.”

“Scottie brings us that intangible of just never quit or never give up, and he really exemplifies that never-say-die attitude,” matod ni Cone kabahin sa 25 anyos nga basketbolista.

“His energy is always there. You don’t get see him in practice but he’s like that in practice too, the stuff he does in games, he does in practice all the time.”

Sa iyang bahin, si Cabagnot nahilakip sa gitawag og Fab Five sa Beermen nga nakahakot og unom ka mga titulo sulod sa 11 ka mga komperensiya gikan niadtong 2014-15 season.

Napili si Cabagnot isip Finals MVP niadtong 2017 Commissioner’s Cup.