GOODLUCK NA LANG NILA: ARUM
“Good luck to them.” Kini maoy reaksiyon ni Bob Arum sa Top Rank Promotions human niya nasayran nga posibleng mag-away og balik sila si Floyd Mayweather ug Manny Pacquiao.
Giangkon ni Arum nga posible gyung mahitabo ang
rematch ni Pacquiao ug Mayweather apan iyang giklaro dili siya gustong manghilabot niini.
“Sure it’s a possibility. It’s probably a way that each can make some good money,” matod ni Arum nga nakutlo-an sa Spin.ph. Si Arum ang naggiya kang Pacquiao. “But, you know, I don’t want
any involvement in it.”
Napupos na ang kontrata ni Pacquiao sa Top Rank hinuon giklaro ni Pacquiao nga dili pa hingpit nga sirado ang iyang pultahan alang kang Arum.
Gipasabot ni Arum nga kasamtangan na siyang nagtutok sa batan-ong mga boksidor nga adunay poruhan nga makakulit og dakong pangalan sa boksing sa ugma damlag.
Subay niini, gitubag ni senator Pacquiao nga daw matilawan na sa Amerikanong boksidor ang labing unang kapildihan niini.
“50-1. #NoExcuses,” mao kini ang gi-post ni Pacquiao sa iyang Instagram account human nipabuhagay si Mayweather nga molugnot siya gikan sa pagretiro aron makigaway og balik sa Pambansang Kamao sa Pilipinas.
Sa post ni Pacquiao, tataw nga iyang gipasabot nga maputol na ang 50 ka sunodsunod nga kadaugan ni Mayweather nga usa ka rekord sa kasaysayan sa boksing.
Si Pacquiao gikan sa iyang impresibong kadaugan batok kang Argentinian Lucas Matthysse sa Kuala Lumpur, Malaysia niadtong Hulyo 2 aron langkaton ang WBA title.
Sa laing bahin, ang tawo nga nakaaway na ibabaw sa ring ni Pacquiao ug Mayweather nga si Juan Manuel Marquez ang nasurprisa sa dihang nahibawo nga mahinayon ang rematch ni Pacquiao ug Mayweather.
Matod ni Marquez nga dili siya motuo niini. “I don’t believe that. I don’t believe that. Yeah!,” matod ni Marquez sa usa ka ambush interview.
Mao usab kini ang pagtuo sa laing inilang boxer sa US nga si Mikey Garcia. “No I don’t believe it will happen,” ingon sab ni Garcia. Hinuon ang mga tigpaniid nga kining tanang pagduda matubag na unya sa higayon nga aduna nay pinirmahay nga matigayon ang duka ka kampo.