P200K SA MAKATUDLO SA KILLER NI CHIAOCO

Mokantidad og P200,000 nga reward money alang sa makatudlo sa mamumuno sa gipatayng negusyante nga si Johnson Sy Chiaoco, gitanyag sa usa ka negusyante sa siyudad sa Mandaue.

Matud sa director sa Mandaue City Police Office nga ang negusyante nitanyag nga concern alang sa seguridad sa ubang mga negusyante sa siyudad.

Usa ka semana na karong adlawa, sukad sa pagpusil-patay sa negusyanteng si Chiaoco diha mismo sa likod sa iyang tindahan human sa iyang pagpark sa sakyanan sa may dan Hernan Cortes, Brgy. Cabangcalan, dakbayan sa Mandaue.

Hangtud karon giangkon sa kapulisan nga padayon pa sila sa pag-ila sa gunman ilabi na nga ang nahipos nila nga kuha sa cctv footage ug kuha sa dashcam sa sakyanan sa biktima, di maklaro ang nawng sa nipusil tungod sa gisul-ob nga helmet.

Apan daku ang pagtuo sa kapulisan nga adunay nakasaksi sa pagpamusil ug posibleng nakakita sa panagway sa gunman, kinsa ilang gilantawan nga taud-taud na nga nag-istambay sa lugar samtang nagpaabot sa pag-abot sa biktima.

Hinungdan nga padayon ang paghangyo sa mga pulis niadtong makahatag kanila og dugang impormasyon.

Gani adunay madawat nga P200,000 kon kinsa kadtong makahatag sa impormasyon sa nahimutangan sa mga mamumuno.

Kini human nga niadtong Dominggo, nakadawat og tawag si MCPO director nga si P/ SSupt. Julian Entoma, sa nagpaila lang nga businessman sa Mandaue City nga nitanyag og reward money.

Matud ni Entoma nga wa kini nagpaila sa iyang pangan apan nihulagway kini nga maayong negusyante si Chiaoco, ug nga concern siya alang sa kaluwasan sa uban pang mga negusyante sa dakbayan.

“Gani may ningtawag na sa ako nga wa magpaila, ingon siya: Sir ikuan mo lang sir nga anonymous. I am capable nga muhatag og (reward) para sa information leading to the identity sa killer o sa mastermind. Mohatag siya og P200,000. Maong ako ni karon gi-publicize nga that was a cal,” butyag ni Entoma.

Apan giklaro ni Entoma nga maanaa o way reward money, ang kapulisan ang naningkamot alang sa pagkab-ot sa kasulbaran sa krimen busa gitukod ang Special Investigation Task Group kon ‘SITG Chiaoco’.

“Wa mi muasa sa reward, ang among ihangyo sa mga tao nga maski with or without the reward, kung aduna man tay kinalaman o nahibaw-an, isullti nato,” dugang ni Entoma.

Pabiling personal grudge tungod sa negusyo sa biktima ang ilang gisunod nga motibo sa krimen.

Ang kanhi niini kasusyo mao usab gihapon ang ilang gitumbok nga person of interest sa pagpatay.

Apan ila usab gitan-aw ang posibleng kalambigitan sa uban nga duol kaniya, sama sa mga kawani niini.

Samtang di usab angay nag maalarma ang ubang mga negosyante sa dakbayan bisan human sa nahitabong pagpatay kang Chiaoco.

Apan iyang awhag kanila o bisan sa publiko nga adunay madawat nga mga hulga sa ilang kinabuhi nga mupahibalo sa kapulisan aron mapangitaan og paagi, matambagan sa angay nga buhaton aron kapugngan ang kalautan.