DAPIT GIILA SA MGB NGA KUYAW SA LANDSLIDE

Gibutyag sa Apo Land and Quarry Corporation nga aduna na sila’y mining rights apan wa pa sila makasugod sa ilang quarry operations sa Sitio Tagaytay ug Sitio Sindulan, Barangay Tinaan, dakbayan sa Naga diin nahitabo ang pagdahili sa yuta.

Matod ni Chito Maniago, tigpamaba sa Apo Land and Quarry Corp., nga aduna sila’y nagkadaiyang quarry operations sa dakbayan sa Naga, apan gipanghimakak niini nga aduna sila’y operasyon sa

quarry sa nahitaboan sa pagdahili ingon man sa duol niini.

Apan base sa aerial view sa hulagway nga nanggawas makita nga anaa sa kilid kining duha ka sitio nga apektado sa pagdahili sa lugar nga aduna’y ga-quarry. “We have quarries on different areas in Naga. But as of now we don’t have any operation of quarry near the area,” si Maniago nagkanayon.

Gibutyag usab niini nga pipila ka adlaw ang nakalabay dihang nag house-to-house na sila sa mga panimalay sa dapit aron ipa-relocate ang mga pamilya aron malayo sa dapit.

Nakig-coordinate na usab ang Apo Land and Quarry Corp., sa local government unit ingon man sa Mines and Geosciences (MGB) 7 kabahin sa reports kaniadto nga ni crack na ang yuta sa dapit.

Isip hinabang sa ALQC sa mga biktima sa maong pagdahili, nitunol na kini og pagkaon ug tubig.

Gitun-an na usab nila ang paghatag og financial assistance sa mga biktima sa pagdahili. / HBL

/ TAMPO JONJI GONZALES ■ AERIAL VIEW: Kini nga hulagway kuha sa Office of the Presidential Assistant for the Visayas (OPAV) nga misusi sa Barangay Tinaan, dakbayan sa Naga. Sa tuo sa hulagway, makita ang landslide area samtang sa ibabaw ug kilid ang quarry site sa Apo.

ALAN TANGCAWAN / ■ NAIGO: Grabe ang kadaut sa mga balay nga wa man tuod matabuni, apan naabtan sa dagkong mga bato ug yuta nga mingdahili gikan sa sityo Tagaytay ngadto sa sityo Sindulan sa Barangay Tinaan, dakbayan sa Naga.

/ ALAN TANGCAWAN ■ MANO-MANO: Mga lumolupyo ug uban pa (wala nga hulagway) nagtinabangay sa pagkawot sa dapit diin gituohang dunay balay nga nalubong ug nakapangayog panabang ang mga nagpuyo niini.

ALAN TANGCAWAN / ■ ARON PASPAS: Nigamit og backhoe ang mga rescuer sa ilang pagkuykoy sa dapit diin usab gituohan nga duna pay nangalubong nga buhi.

/ ALAN TANGCAWAN ■ PATAY: Gihan-ay sa usa ka lugar ang mga lawas nga unang nangaugkat gikan sa dapit nga naigo sa landslide.