Mga magtutudlo, kawani sa DepEd sa 3 ka mga lungsod negatibo sa kinalit nga drug test sa CPADAO

Moabot sa kapin 800 ka mga teaching ug non-teaching personnel sa Department of Education (DepEd) sa tulo ka mga lungsod dinhi sa Sugbo ang gipaubos sa kinalit nga drug test sa Cebu Provincial Anti-Drug Abuse Office (CPADAO).

Hinuon, walay nag-positibo. Samtang lima sa kapin 1,500 ka mga opisyal ug kawani sa nagkadaiyang local government sa Sugbo nga gipaubos sa susamang drug test gikan Agosto hangtud niining buwana ang nag-positibo.

Matod ni CPADAO Executive Director Ivy Meca nga moabot sa 183 non-teaching ug teaching personnel sa lungsod sa Ronda, 376 sa Tabogon ug 252 sa Tabuelan ang nag-negatibo sa kinalit nga drug test.

Ang drug tests gipahigayon niadtong Agosto 29, Septiyembre 4 ug Septiyembre 6.

Sa laing bahin, naa sa 389 ka mga opisyal ug kawani sa Tabogon local government unit ang gi-drug test niadtong Agusto 1, diin upat niini nagpositibo sa paggamit og drugas.

Niadtong Agusto 8, 303 ang gi-drug test sa Sogod LGU, lakip na sa ilang mga elected officials, PNP personnel ug mga empleyado, diin negatibo silang tanan niini.

Negatibo sab tanan sa drug test ang Bureau of Jail Management and Penolofy (BJMP) Minglanilla personnel nga gidrug test niadtong Agusto 23 ug 93 ka kawani sa siyudad sa Naga niadtong Agosto 28.

Dugang ni Meca, niadtong Septiyembre 3, 265 ka mga kawani ug opisyal sa Sta. Fe ang ilang gi-drug test ug laing 198 sa lungsod sa Poro niadtong Septiyembre 17, diin silang tanan negatibo sab niini.

Sa drug test sa CPADAO sa 59 ka mga kawani ug opisyal sa brgy. Poblacion Danao niadtong Septiyembre 10, usa hinuon ka tanod ang nag-positibo niini.