Makalangay

Niadtong Lunes, dunay panagbangga sa Cebu South Coastal Road nga nakaingon sa paghuot sa trapiko hinungdan nga si Cebu City police director Sr. Supt. Royina Garma nimando sa Traffic Group sa kapulisan sa pagresponde sa dapit. Apan way bisan usa ka pulis ang nitubag. Sa naandan, ang mga traffic enforcer ang nitubag sa alarma nga gikasuko ni Garma hinungdan nga iyang gipangrelibuhan ang siyam sa ka mga pulis.

Iya usab nga gisultihan ang Cebu City Traffic Office sa pagdili na sa ilang mga traffic enforcer sa paghimo og sketch kon dunay mga panagbangga sa sakyanan. Iya kining gitahas sa mga police station.

Kasagaran sa makaingon sa paghuot sa trapiko mao ang minor nga mga aksidente sa dumbol. Kini nga hitabo, kon di dayon magkasinabot ang duha ka mga partido, ang mga sakyanan nga nangalambigit magbabag og dugay sa dan kay naghuwat pa sa traffic enforcer nga mohimog sketch sa bangga aron pagdeterminar kinsa ang sad-an.

Karon nga gitahas na kini ngadto sa kapulisan, makaya ba kaha kini nilang mao nga gimbuhaton? Nabansay ba kaha sila niining pagtubag og alarma sa bangga ug paghimo sa mga tahas nga gikinahanglan alang ning mao nga gimbuhaton? Segurado, ang mas nakahibawo niini mao ang mga pulis nga naa sa trapiko na-assign.

Lain na sab nga gimbuhaton kining gisangon ngadto sa kapulisan human gibungkag ang mga section, sama sa Homicide Section, kay gipangbalhin sila sa mga police station.

Bisan gani sa pagpatrolya sa kadalanan di pa gani daghang mga pulis ang makit-an, unsa na kaha ang pagtubag gilayon og alarma sa bangga?

Inay kuhaan ang traffic enforcers og tahas, di kaha maayo nga mas seguruon ni Garma nga ang mga traffic police mas mokugi sa pagbuhat sa ilang tahas. Niini, mas segurado pang mopaspas ang pagtubag.