Daghang wa nay respito sa atong bandera
Nagpadayon ang debate sa Senado kalabut sa pag-amendar sa Republic Act 8491 kon Flag and Heraldic Code of the Philippines. Ang maong balaud wala lamang maghisgut sa atong bandera kon dili apil sa atong National Anthem.
Si Senate President Vicente Sotto III misugyot nga ilisdan ang katapusang linya sa atong National Anthem kun Lupang Hinirang. Inay “Aming ligaya na pag may mang-aapi, ang mamatay ng dahil sa ‘yo” nga negatibo kaayo, ngadto sa “ang ipaglaban ang kalayaan mo.”
Si Senador Richard Gordon usab buot nga dugangan og laing bidlisiw (ray) ang adlaw (sun) sa atong bandera. Kini kuno ang magrepresentar sa mga Muslim leaders.
Maayo man ang mga sugyot sa duha ka senador apan alang kanako mas mahinungdanon ang estriktong pagpagtuman sa gimbut-an sa balaud kalabut sa pagpakayab sa atong bandera ug pag-awit sa National Anthem. Ang balaud nagbuot nga tanang mga buhatan sa gobiyerno ug mga educational institution kinahanglang mag-flag-raising ceremony matag Lunes sa buntag ug ipaubos kini matag Biyernes sa hapon. Inig flag-raising ceremony ug flag retreat kinahanglang mohunong ang mga tawo nga anaa sa duol ug ipatung ang ilang tuong palad sa ilang dughan. Mao kini ang wala na hatagi og pagtagad sa daghang mga tawo. Daghan usang gisi-on nang mga bandera nga nagpadayon sa pagkayab sa mga flagpole nga wa gayud ilisdi. Pila na man lang usab sa atong kabataan ang naka-memorya sa Philippine National Anthem? Kini unta maoy tutokan sa atong mga magbabalaud ug mga tinugyanan sa balaud.
Maapil kaha si Ilocos Norte Governor Imee Marcos sa Senate slate sa maghiusang PDP-Laban Party ug sa Hugpong ng Pagbabago ni Davao City Mayor Inday Sara Duterte-Carpio? Sumala gud sa usa ka tinubdan nga ang duha ka mga partido magpili og dose ka mga senatorial candidates nga ilang suportahan.
Sumala sa tinubdan, nga usa ka magbabalaud, nga sila si Mayor Carpio ug si Energy Secretary Alfonso Cusi, PDPLaban vice chairman- nagkauyon niining pito ka mga senatoriables: Sen. Koko Pimentel; Bong Go; Harry Roque; Rep. Zajid Mangudadato; Francis Tolentino; Bato dela Rosa ug kanhi broadcaster Giggy Manicad. Maapil sad kuno ang tulo ka re-electionist senators Sonny Angara, JV Ejercito ug Cynthia Villar. Gikonsiderar sab kuno si Rep. Pia Cayetano. Ang ikadose kuno usa ka laing re-electionist senator nga gituhoang si Nancy Binay.
Unsa na may mahitabo kanila ni Rep. Karlo Nograles, Gov. Imee Marcos ug kanhi senador Jinggoy Estrada? Kini si Nograles nga ig-agaw ni Mayor Sara kanunay niyang i-indosar uban kanila ni Gov. Marcos ug Jinggoy Estrada. Si Marcos kanunay gyud nga makita sa mga kalihukan nga naa si Presidente Duterte. Final na ba kini o duna pay himuon nga survey niining mga senatoriables aron masayran kon si kinsa ang adunay dakug kahigayonan nga modaug? Wa bay convention nga pagahimuon aron pilian sa partido ang mga kandidato nga angayan nilang suportahan?