You can win if you want
Namatikdan ko nga concern gyud si Vince nako. Kon magkakita mi, labi na sa eskol, kuyogan gyud ko niya. Parehas karon, gihuwat gyud ko niya ning buntaga ug gihatod ko niya sa akong classroom. Morag gusto ko na siyang sugton kay klaro man nga true love ang iyang feeling nako.
But nagduha-duha pa gyud ko. Usa ra ang rason, ang akong feeling ngadto niya. Until now wa pa gyud ko makaseguro sa akong gibati kon love ko ba sab siya. Nuon, di siya lisod mahalon. Di tungod kay dato sila ug guwapo siya, kondi tungod kay buotan siya nako
Di na malali nga tinarong gyud ang tuyo ni Vince nako. “Unya, ha, Laura.” “Unsay unya?” Nahikatawa na lang ko sa nakita kong kamalipayon ni Vince.
“Kuan ba, magdungan tag lunch sa gawas. Ako ang mobayad kay ako man ang nag-imbetar nimo.” Naghunahuna kog kadiyot. “Aw, libre man kaha.” Mikatawa kog kusog. “Sige.”
Malipayon kong misulod sa akong classroom kay nahiabot na ang among propesorang maldita.
Hapit na gyud ang twelve noon sa akong pag-abot sa fast food nga giingon ni Vince. Nag-una siya nako. Duna na gani mga pagkaon ug drinks sa ibabaw sa lamesa nga iyang nahimutangan. Milingkod ko sa iyang atbang.
“Nag-order ko daan og atong makaon ug mainom, Laura. Maikog ko nimo nga maghuwat og dugay.”
“Sus, ayaw nang ikog-ikog, uy, Vince. Kining, unsa man diay okasyon?”
Nagsugod na mig kaon niadtong tungora.
“Wa lang. Gusto lang nako nga magkadungan tag lunch ron. Kon mahimo pa lang, everyday gusto kong ikasawo tikag pangaon.”
“Uy, korni.” Mitukiki kog katawa. Miinom ko sa akong drinks kay natuk-an ko. Nahikatawa na lang sab si Vince. “Unsa kaha kon sugton ko nimo ron, Laura?”
Mikidhat pa si Vince nga mitan-aw og dugay nako.
“Isip bayad sa imong pagpakaon ron nako?” Mikatawa na sab ko.
“Di, uy. Kanindot kaha kon uyab na tika, no, Laura?”
Miseryuso ko. Miinom ko sa tubig sa akong baso. Miginhawa kog lawom.
“You know, Vince, di ka lisod higugmaon. But unsaon man sab, uy, nga hangtod karon wa pa man gyud nako maklaro kon unsa ang tinuod kong gibati nimo.”
Nakapanghupaw si Vince.
(SUMPAYAN)