BACKGROUND SA MAGTIAYON GISUSI SA CCPO
Mitabang na karon ang Cebu City Police Office sa back ground investigation labot sa tulo nga nakuhaan og kapin sa usa ka kilong gituohang shabu nga mobalor og P14 million sa buy bust operation sa Mandaue City Police Office sa Figueroa street, Barangay San Nicolas, siyudad sa Sugbo niadtong Martes.
Matod ni Sr. Supt. Royina Garma nga ila pang ipasusi kon nalakip ba sa target list ang tulo nga silang Adel ug Jasmin Villafuerte ingon man si, Ronnel Ylanan.
Apan wa na masurpresa pa si Garma nga makakuhag usa ka kilo sa gituohang shabu ang kapulisan sanglit abunda pa gihapon ang illegal nga drugas sa syudad sa Sugbo.
Nagtuo siya nga gikan sa Luzon ang supply nga mangabot sa syudad sa Sugbo nga mao usab ang ipang apod-apod sa mga silingang dakbayan ug probinsya.
Wa usab niya wad-a ang posibilidad nga adunay shabu laboratory o ba kaha bodega nga maoy gihimong stock room sa illegal nga drugas. “Baka mayroong laboratory o bodega, hindi natin alam yan pero may naririnig tayong information na ganyan pero wala pang confirmation kasi magtataka ka bakit ang daming supply pa rin dito sa Cebu,” matod ni Garma.
Ang nakuhang drugas magpamatuod lang kini nga daghan pa kaayo ang supply sa drugas sa syudad sa Sugbo nga iyang gihulagway nga lisud sulbadon kon ang pulis ang ang pasagdan.
Sa ilang impormasyon nga nakuha, ang mga drug courier o ang nagtago sa supply sa drugas mao kadtong mga tawo nga wa malakip sa target list sa kapulisan. Mogamit usab sila sa mga senior citizen ug mga babaye nga di mailhan nga nalambigit sa illegal nga kalihukan.
Nagtuo si Garma nga sakop sa usa ka sindikato sa illegal nga naglihok sa Central Visayas ang mga nangadakpan sa MCPO.
Ang maong grupo gisusi pa sa intelligence sa CCPO kon kinsa ang ilang amo ug asa sila magkuhaan sa supply sa kaulohan.