GINEBRA, BLACKWATER MAG-ILOG SA LIDERATO
Mga duwa karon: (Araneta Coliseum) 4:30 pm. – Dyip vs. San Miguel 7:00 pm. – Ginebra vs. Blackwater
Human sa makapakaging nga kadaugan batok sa NorthPort Batang Pier niadtong Miyerkules, ang Blackwater Elite mosakbang sa co-leader ug crowd-favorite Barangay Ginebra sa main attraction karong gabii sa PBA Governor’s Cup sa Araneta Coliseum.
Ang Elite ni coach Bong Ramos mirehistro sa ilang ikatulong sunodsunod nga daog human nila mapapas ang 18 puntos nga labaw sa kontra aron surprisahan ang inilog nga Batang Pier, 113-111.
Ang 3-0 nga baraha sa Elite sa maong conference maoy pinakaanindot nilang pagsugod sa conference sukad sa pagsulod nila sa PBA, tulo ka tuig ang nakalabay.
Batok sa Ginebra nga sama kanila nakaposte na usab og 3-0 nga baraha alang sa liderato, ang Blackwater gipaabot nga makasagubang og malisod nga tahas apan ang kataas sa ilang moral maoy butang nga dili angay kompiyansaan ni coach Tim Cone ug sa iyang Kings.
Sa gihapon, ang import nga si Henry Walker, nga abagan nila ni Poy Erram, Mike Digregorio, John Pinto, Mac Belo ug Chris Javier ang gipaabot nga mowadwad alang sa Elite.
Samtang sa Ginebra, padayon man tuod nga dili makaduwa ang seven-footer nga si Greg Slaughter tungod sa injury, apan ang pagkahimsug og balik ni Japeth Aguilar nga makatimang sa ilang import nga si Justine Brownlee uban nila ni Scottie Thompson, LA Tenorio, Jeff Chan ug sa beteranong si Mark Caguioa maoy hait nga hinagiban ni coach Cone.
Apan sa dili pa ang Ginebra-Blackwater encounter, mosuway pagbangon ang San Miguel Beer (1-1) human sila mabiktima sa Blackwater, 103100, niadtong Septiyembre 5, pinaagi sa pagpakigsangka sa wala pay daog nga Columbian Dyip (0-5).
Sa gihapon, ang Beermen moduwa nga wala ang 4-time MVP awardee nga si June Mar Fajardo kinsa padayon pang nagpaalim sa iyang angol.
Hinuon anaa si Christian Standhardinger nga maoy modala sa ilawom nga bahin alang sa Beermen.