You can win if you want
Mihunong pagkaon si Vince. Sagunson siyang nanghupaw. Nasabtan ko ang iyang gibati. “Sori, Vince, kon napasakitan tikag sulti. Pero mao gyud nay tinuod. Lisod para nako ang pagsugot nimo nga wa nako maseguro ang tinuod kong feeling nganha nimo.”
“It’s okey, Laura. Di man sab ko mosugot nga makigrelasyon ka nako tungod kay napugos ka lang. Maoy akong gusto nga sugton ko nimo agad sa tinuod mong gibati nako”
Mipadayon mig kaon si Vince. Wa na mi maghisgot bahin sa gugma. Pagkahuman namog kaon, namalik lang sab dayon mi sa eskol kay hapit na man ang ala una nga maoy oras sa first subject namo sa hapon. Bisag lainlain ang building sa among klase, apan tungod kay suod man mi si Vince, nagtug-anay mi sa oras sa among mga subject sa adlaw nga tingklase.
As usual, gihatod na sab ko ni Vince sa akong classroom. Pagkahuman miadto na siya sa iyang classroom.
Pagka hapon, na-stranded ko sa eskuwelahan kay nagbaha ang kadalanan sa siyudad. Unsaon, kusog man ang uwan. Nag-estambay ko sa main lobby. Unang mipauli si Vince kay mas sayo man ang katapusan niyang subject anang hapona.
Nakatan-aw ko sa lalaki nga nagdagan nga misulod sa gate sa eskuwelahan. Si Dino. Nahumod gyud siya kay wa man siya makadalag payong. Mihunong siya ug nanarapo sa face towel sa iyang nawong ug buhok nga nabasa. Wa siya makakakita na ko.
Duna koy namatikdan niya karon. Midaot siya. Giduol ko siya.
“Kusoga sa uwan, uy, Din.” Nakatan-aw si Dino nako. Naka-smile siya apan anang pahiyom nga morag dunay sagol nga kaguol.
“Bitaw, Lau. Nia, nabasa gyud ko. Paggikan nako sa balay ganina, wa may uwan maong wa ko magdalag payong.”
“Ingon man gyud ani ang panahon ron, Din. Mag-usab-usab.”
“Bitaw. Sige, ha, Lau, moadto na ko sa akong classroom.”
Gisundan ko sa pagtan-aw si Dino nga nagdaling mibiya nako. Morag naglikay na siya nako. Aw, giingnan ko man siya nga mohunong na sa pagpangulitawo nako kon maoy iyang pagtuo nga si Vince ang akong sugton kay anak kinig dato.
Gibuntog si Dino sa katalaw kay gipakaubos niya ang iyang kaugalingon. Giisip na niya nga wa siyay dag-anan kang Vince sa ilang gugma nako.
(SUMPAYAN)