3,000 apil sa Gaisano Run, Oct 28

Gibanabanang moabot sa 3,000 ka runners ang magginukdanay sa Gaisano Country Mall 25th Anniversary Run nga ipahigayon karong Oktubre 28 sa Gaisano Country Mall parking area.

Nagkanayon si race director Joel Baring nga nagtuo silang mosaka ang mga partisipante ning higayuna gikan sa kapin sa 2,000 sa miaging tuig gumikan kay aduna sila’y bag-ong kategoriya nga gidugang – ang 6K Challenge.

“Last year kay mura’g 2,000 plus ra man ta pero karon tungod sa bag-o natong category, we expect nga moabot ta’g 3,000,” matod ni Baring sa press conference kagahapon sa Lighthouse Restaurant Tower sa Gaisano Country Mall.

Matod ni Baring nga sa 6K Challenge, nga alang lang sa mga Pinoy nga nag-edad og 18 ngadto sa 45 anyos, ang mga partisipante adunay mga obstacle nga agian nga gipahiluna sa Central Command sa Camp Lapulapu sa brgy. Lahug.

Si Major Christian Uy, kinsa maoy gitahasan sa paghan-ay sa mga obstacle, mipasabot nga ang ilang gihimo daw sama og gamay sa usa ka tipik sa training sa mga sundalo diin migamit sila og mga ligid aron maagian sa mga partisipante.

“Actually, mura ra gyud ni siya’g duwaduwa lang,” pasabot ni major Uy.

Ang nag-organisar sa lumba nga si Charmine Nograles nagkanayon nga ang mga mananaog sa tanang mga kategoriya gawas lang sa 6K makadawat og ganting salapi.

Sa kinatibuk-an, dul-an sa P100,000 ang ganti nga ipang-apod-apod sa mga mananaog.

Gawas sa 6K, ang ubang mga kategoriya nga kombatihan mao ang 5K, 10K, 15K ug 21K.

Ang rehistrasyon nagkantidad og P400 sa 5K, P800 sa 6K, P500 sa 10K, P600 sa 15K ug P700 sa 21K.

Ang registration centers nahimutang sa Gaisano Country Mall customer service, Gaisano Main customer service, ug Runnr sa Ayala Center Cebu.

Ang tanang kita sa lumba ihatag sa beneficiary niini nga mao ang mao ang Missionaries of the Poor.

“We hope and pray this will be successful,” matod ni Alyssa Jan Gaisano, anak sa tag-iya sa Gaisano Country Mall.