You can win if you want
Milabay pa ang mga adlaw. Miabot ko sa point nga mipitik na ang akong kasingkasing sa paghigugma. Naglaom ko nga kini na ang gibati ko kang Vince. Apan kon siya ang akong hunahunaon, wa koy bationg kalipay. Misamot man unta ang among panag-uban kanunay, sa pagpanuroy, sa pagpangaon sa gawas, ug sa pag-swimming sa beach.
Ingon diay ani ang bation sa babaye ngadto sa opposite sex kon kini wa ipitik sa kasingkasing sa babaye. First experience pa nako nga mibati ning pagbatia. Di ko mahimong masayop, nahigugma na gyud ko.
Gihatagan ko pag laing higayon ang akong kaugalingon. Kon nahigugma na ko, kang kisan man kon di si Vince? Si Vince na man lang ang lalaki nga nagpabiling nangulitawo nako. Bahin kang Dino, wa na siya mopadayon sa iyang gugma nako. Wa na gani siya maghatagan og balot nako. Sa laktod, gilikayan na ko niya. May nahunahunaan ko. “Kon sugton tika ron, Vince, bisag wa pa ko makaseguro kon love ba tika, mosugot ka?”
Kausa ana dihang nag-dinner date mi si Vince, gisultihan ko siya sa ania sa akong hunahuna. Gusto man gyud nakong maseguro kon nahigugma na ba ko niya, ug siya na ba ang lalaki nga gipitik sa akong kasingkasing. Nabatyagan ko kaayo karon nga mibati na kog gugma. Kaniadto, di ko mag-atiman sa akong kaugalingon. Di gani ko mamulbos sa nawong ug sudlayon ko lang ang akong buhok sa akong mga tudlo kon nagum-os kini sa eskuwelahan. Di man ko magdala-dalag sudlay sa eskuwelahan.
Apan karon dugay na kong manamin. Tan-awon nako pag-ayo ang akong kaugalingon sa dakong salamin sa akong kuwarto. Magbutang na kog nipis nga lipstick sa akong mga ngabil. Magpahumot na sab ko. Ug labaw sa tanan, makamao na kong mobagay sa akong isul-ob kon angayan ba ko o dili.
Na, unsa may tawag ani? Nahigugma na gyud ko, di ba?
“Aw, ang ako untang gusto, Laura, kanang di pinugos nimo. Kana bang gitawag nga gugma gyud ang nagsugo maong gisugot ko nimo. Pero sa laing bahin, mosugot na lang ko anang imong giingon.”
Pila may estorya, nagkasabot mi si Vince nga managhigugmaay na mi.
(TAPUSON SUNOD GULA)