Paglikay sa trahedya

Ang pagdahili sa yuta sa usa ka bukid niadtong buntag sa Huwebes, Septyembre 20, didto sa mga bukirang barangay sa Tinaan ug Naalad, syudad sa Naga, nikalas sa labing menos 35 ka mga kinabuhi, nakaangol og 15 ka mga tawo, samtang laing 44 ang gituohang natabonan ilawom sa nidahili nga mga bato ug yuta.

Ang atong pangutana: mahimo bang kalikayan ang maong trahedya? Dunay mga hitabo nga mahimong malantawan apan di kapugngan. Sumala sa mga taho, duna nay mga tilimad-on sa wa pa modahili ang yuta. Mao kini ang nakit-an nga mga liki sa yuta ug gani gipa-imbestigar kini sa lokal nga kagamhanan.

Sagad nga mahitabo ang pagdahili sa yuta sa mga bukirang barangay. Apan ginagmay ra, di sama sa nahitabo sa syudad sa Naga. Tingali panahon na nga mohiklin kadtong nagpuyo mga lugar nga dakong posibilidad nga dunay landslide.

Nibisita si Presidente Rodrigo Duterte sa syudad sa Naga niadtong Biyernes aron pagduyog sa kasub-anan sa mga biktima sa maong trahedya ingon man sa paghatag og hinabang sa mga survivors.

Nisaad siya nga mohatag og balay sa mga apektadonga pamilya, libreng hospitalization ug burial expenses, nihatag og P20,000 niadtong namatyan og kabanay ug P10,000 niadtong nangangol sa maong hitabo.

Si Special Assistant to the President Christopher “Bong” Go niingon nga gawas sa gihatag sa pangulo, ang Department of Social Welfare and Development mohatag pag P25,000 sa matag pamilya niadtong namatyan sa maong trahedya.

Mobalik ta sa paghisto sa pagpugong sa mga trahedya susama sa nahitabo sa bukiran sa Naga. Si Environment Secretary Roy Cimatu niadtong Huwebes mimando gilayon sa pagsuspenso sa mga opisyales sa Mines and Geosciences Bureau (MGB) 7.

Ang MGB 7 sa sayo pa namahayag nga ang mga liki sa yuta nga nakit-an sa bukiran sa Tinaan, syudad sa Naga natural lang nga hitabo ug di tungod sa operasyon sa quarry sa Apo Land and Quarry. Apan nahitabo na ang pagdahili sa yuta.