Ang National Anthem ni Senador Sotto

Gibaha og negatibong reaksiyson gikan sa mga netizens ang sugyot ni Senator Vicente Tito Sotto III nga ilisan ang liriko sa naghinapos nga bahin sa Philippine National Anthem kon Lupang Hinirang. Kini sigon sa iyang gipabuhagay sa niaging upat na ka adlaw. Gipasabot sa senador nga ang katuyo-an sa iyang sugyot mao nga kahatagan og mas bug-at nga kahulogan ang katapusang hut-ong sa national anthem nga daw sa magtanyag o makaagni sa unya sa mga Filipino og dugang paglaom alang sa nasod.

Gitumbok sa senador mao ang katapusang hut-ong sa liriko sa Lupang Hinirang nga nagkanayon “ang mamatay nang dahil sa ‘yo” himuon na unya ning “ang ipaglaban kalayaan mo.”

Iyang gisaysay nga ang katapusan kunong linyada sa orihinal nga national anthem naghulagway nga ang yutang Pilipinhon mora og napildi ug misurender na.

Gawas niini, ingon ni Sotto, nga dunay gamayng sayop sa ritmo ug sa pamulong nga angay lang sab korehi-an.

Niadtong 2013, ang nailang singer/composer nga si Joey Ayala adunay iyang kaugalingong rendisyon sa Lupang Hinirang nga alang kang Sotto mas kalmado ug maayo usab nga pagkalitok ang mga pinulongang Pinoy.

Matod sa senador nga mas mopabor usab siya niini diin ang katapusang linyada sa kanta nag-ingon “ang nagmahal nang dahil sa ‘yo.” Lisod sabton ang punto ni Sotto kay mora og iya man kining ipahaom ang anthem sa sitwasyon sa bag-ong panahon.

Dako kining salikwaot tungod kay magguba ang orihinalidad sa kanta nga gipasibo niadtong panahon sa atong mga katiguwangan, kinsa mao gyud mismoy nakigbisog ug nagpakamatay tungod ug alang sa atong nasod.

Kini maoy gihatagan og dakong kahulogan sa kasaysayan sa atong nasod. Mao unta kini angay lantawon ni Sotto.