Bunkhouse sa Apo may mga tawo?

Nagsigig hisgot ang akong mga kuyog nga sakop sa Kilusang Pagbabago nga dunay bunkhouse sa Apo Land Quarry Corp. nga naapil sa dakong landslide sa miaging semana.

Nikuyog man gud ko sa misis nga si Doris, ang Visayas lead convenor sa KP, ug pipila ka sakop sakop sa KP chapter sa Naga sa miaging Dominggo sa hapon.

Nangadto mi sa tumoy sa bukid sa Barangay Naalad nga naa sa atbang sa bungtod diin kanhi nagtungtung ang sitio Tagaytay sa Barangay Tinaan.

Didto, makita namo ang tibuok area nga apektado sa grabing pagdahili sa bukid diin moabot na sa hapit 50, kon wa pa man gani, ang mga naugkat nga patay.

Ambot kon duna pa bay makit-an nga buhi. Nagpaduol man kami sa tiilan sa maong landslide diha sa Sitio Sindulan, klaro na gyud ang baho sa mga patay.

Balik sa among pag-adto sa tumoy sa bukid sa Naalad, nagbalik-balik gyud sa paghisgot ang mga taga Naga nga kuyog namo nga duna gyuy bunkhouse sa Apo Land didto sa ibabaw nga dunay mga trabahante.

Matod pa, naa may nagtrabaho dihang nahitabo ang trahedya ug dunay mga tawo nga diha sa maong bunkhouse.

Ang pangutana kay naapil ba kaha og kwenta ang maong mga empleyado? Nakapangutana kami kay nagsigi man gud og panghimakak ang mga opisyal sa Apo Land nga dunay trabaho niadtong tungora.

Gani, duna may naapil nga backhoe sa maong kompanya nga nadala padulong sa ubos pag-landslide.

Ambot kon nakit-an na ba ang missing nga operator sa maong backhoe.

Sa sayo pa, nanghatod kami og mga hinabang nga gipadala sa NGO nga Balay Mindanaw sa Cagayan de Oro. Daghang salamat Caloy Manlupig.

Lakip niini mao ang usa ka SkyHydrant nga water filtration equipment.

Nanghinaot ko nga nagamit dayon ang maong ekipo labi na karon nga nagtakodtakod ang kalibanga sa mga evacuation centers.

Apil sab sa mga gipadala sa Balay Mindanao ang 50 ka mga folding beds nga gipahatod ni Mayor Kristine Chiong ug Val Chiong ngadto sa mga volunteers sa Ground Zero.

Naa say mga moskitero, mga container sa tubig, ug uban pa.

Samtang didto mi sa Naga City Hall, nakadayeg ko sa atong mga kaigsuonan nga nangadto gyud dala ang mga hinabang. Naay daghang mga pamilya kuyog ang mga anak nga nag-iyahay og bitbit sa ilang hinabang.