When I feel this way

Una kong nahiabot sa Goldilock’s. Menus singko para twelve noon. Wa madugay nahiabot si Suzy. Malipayon ming duha nga nagbeso-beso. Aw, di na makuwestiyon ang among friendship nga sukad pa sa among pagka bata.

Nakalagyo lang mi dihang mibalhin og puyo sila si Suzy ug ang iyang mga ginikanan ug duha ka igsuon sa bag-o nilang balay sa usa ka subdivision sa Banawa four years ago na. Unya nakatan-aw ko sa kauban sa akong amiga, nga di ikatago ang iyang pagka bayot tungod sa pamustora ug linihokan.

“Tuod, akong cousin, Belle. Si Juvey. Gikan sa Canada pero anhi na mopadayog eskuwela sa Cebu. Naa siya nagpuyo ron sa among ba’ay.”

“Hi! Musta, Belle?” Hapit ko makakatawa tungod sa pinaluray nga tingog ni Juvey ug sa paraygon niyang kinusian sa akong kilid. Nakaikid gud ko kay nakalitan ko.

“Well, as usual, Juvs, guwapa ug seksi gihapon.” Nakig-aper si Juvey nako. “Bitaw.”

Samtang nag-estorya mi si Juvey, miadto si Suzy sa counter aron pag-order sa among makaon ug drinks. Birthday karon ni Suzy ug iya kong giimbetar nga anhi sa Goldilock’s mi maniudto. Wa ko makahibawo nga duna diay siyay kuyog nga ig-agaw.

“Gisuginlan ko ni cousin Suzy, Belle, nga katulo ka na na-frustrate sa imong lovelife. Tinuod ba kini?” Miginhawa kog lawom kaayo. Sus, katabian sab diay aning akong amiga, uy.

“Bitaw, Juvs. Malas gyud ko sa love.”

“Way demalas sa gugma, Belle. Di lang sila para nimo, ug ikaw di sab para nila. Ako bitaw, kanunay man sab nasakitan anang gugma. Pero life must go on.” Miyangu-yango ko. “Korek gyud ka ana, Juvs. Wa man ko magpada’a sa naangkong mga kasakit sa gugma ba. Dali ra man kong naka-move on. Sa pagka karon, wa na ko manguyab. Naay daghang gustong mangulitawo nako pero gidispatsar dayon nako.”

“Mitagam ka na, Belle? Ayaw anang kinaiyaha, uy. Bad na. Di maayo nga seradan nato ang atong kasingkasing sa paghigugma. Ako bitaw, kanunay mang open ang akong heart sa paghigugma pag-usab. Pero nag-amping na ko.”

“Wa pa man sab ko mobati pag-usab og gugma, Juvs.”

Unya nahiabot si Suzy nga gikuyogan sa usa ka waiter. Nangaon dayon mi.