Registration sa Milo Run gibingat
Adunay pa’y kahigayunan ang runners sa Sugbo nga makaparehistro sa 2018 Milo Marathon Cebu Leg human nakadesisyon ang mga nag-organisar nga iuswag ang tagal sa rehistrasyon hangtod karong Oktubre 10.
Ang qualifying race sa Sugbo, nga gikatakda karong Oktubre 14, gilaumang makahakot og 20,000 ka runners.
Ang Cebu leg gilangkuban og 3-kilometer, 5K, 10K ug 21K nga mga kategoriya.
Ang mga maka-qualify sa 21K category makadagan sa Milo National Finals nga gikatakda karong Disyembre 9 sa Laoag City.
Atol sa rehistrasyon, gikinahanglang makasumiter og physician’s certificate ang mga modagan sa 21K.
Kagahapon unta ang katapusang adlaw sa rehistrasyon apan nakadesisyon ang mga nag-organisar nga inaton kini og dugang 15 ka mga adlaw aron hatagan ang ubang runners nga makaparehistro.
Gibutyag ni Cebu leg head organizer Ricky Ballesteros nga sama ra gihapon sa miaging tuig ang rota sa lumba apan ning higayuna, wala’y labot ang 42K full marathon.
Kahinumdoman nga ang Cebu maoy host sa national finals sa miaging tuig diin milampos ang garbo sa Sugbo nga si Mary Joy Tabal sa pagsakmit sa ikalima niyang sunodsunod nga mga titulo.
Sa sayo pa, mikompirmar nang daan si Tabal, 29th Southeast Asian Games champion, nga iyang depensaan ang iyang titulo sa national finals ning tuiga. Isip defending champion, si Tabal dili na moagi og qualifying race.
Ang Cebu leg usa lang sa 10 ka qualifying nga mga lumba nga gikatakada sa nagkalainlaing suok sa nasod.
Ang rehistrasyon nagbalor og P950 sa 21K, P850 sa 10K, P160 sa 5K ug 3K samtang P110 alang sa mga estudyante nga managan sa 5K ug 3K.