PEKE NGA EVACUEES?

NAGA DUNAY ADVISORY SA HINABANG

Gikataho nga dunay mga tawong ningpahimulos sa panahon pinaagi sa pagdawat usab og hinabang bisan dili biktima sa landslide niadtong Huwebes sa dakbayan sa Naga

Mao kini ang nadawat nga tawo sa Superbalita Cebu ug gikompirmar sa usa ka opisyal sa Naga nga nakadawat usab sila samang taho ug ilang gisusi kini sa pagkakaron.

Si Gary Cabotaje, sekretaryo sa konseho sa Naga ug gitahasan nga tigpamaba sa dakbayan bahin ning kalamidad, nanawagan sa publiko nga dili mopahimulos sa panahon.

“Kami sa Naga di gyud mo maka-control kon si kinsa man nga mga grupo nga mag-initiate alang sa mga donation, kay kami man ang nanginahanglan, kami igo lang sa pagpasalamat ug pagdawat,” matod ni Cabotaje.

Apan si Cabotaje niawhag sa mga grupo ug indibiduwal sa pagpasa sa ilang hinabang sa tukma nga ahensiya sa kagamhanan, labi na sa kuwarta, inay modirekta sa mga bakwit.

Ang tambag sa kagamhanan sa Naga sa mopadangat sa ilang mga hinabang sa Naga City Hall, diin sa main entrance makita dayon ang drop-off point sa donations, adunay mga kawani nga moatiman dayon kanila, diin ipalista kon si kinsa ang mga ni-donate, lakip na ang ubang impormasyon ug kon unsa ang gipang-donate.

Alang sa taga lagyong lugar, mahimo sila nga moadto sa ilang lokal nga kagamhanan aron masiguro nga mahatod sa City of Naga, ilabi na sa mga biktima ang maong mga hinabang.

Samtang, niadtong buot nga mohatag og check o cash donations, kon personal nga itunol, direktang ihatod kini sa treasurer's office, diin hatagan ang mga nag-donate og acknowledgement receipt o official receipt.

Ug niadtong mga nagplano nga ipada ang cash donations, giklaro ni Cabotaje nga diha lang kini ipadala sa bank account sa City of Naga, ang account name: City of Naga – Trust Fund sa account number: 0735-021566-030, bank name: Development Bank of the Philippines (DBP), Osmeña Blvd. Cebu City.

Gihangyo kadtong ni-donate pinaagi sa bank deposit, gihangyo nga ipa-photocopy o ipa-scan ang deposit slip ug i-email ni City treasurer Ana Maria Gabilan sa annagabilan@yahoo.com

PASIDAAN SA MGB 7

Niadtong 2008 pa lang, girekomendar na sa Mines and Geosciences Bureau (MGB) 7 nga angayan nang ibalhin ngadto sa luwas nga lugar ang mga pamilya sa Sitio Sindulan, Barangay Tina-an, dakbayan sa Naga.

Base sa 1:50,000 scale geohazard mapping nga gipahigayon sa MGB sa 2006 ug 2010, ang Barangay Tina-an, gi-classify na nga moderate ang iyang susceptibility rating sa landslide.

Ang team sa MGB 7 nga gipangulohan ni geologist Abraham Lucero Jr., kinsa niretiro na, nitumbok sa iyang field report niadtong Agusto 2008 sa pagpabalhin sa 26 ka mga pamilya nga nagpuyo sa tiilan sa bungtod diin aktibo ang landslide.

Ang maong field data sheet alang sa barangay nadawat ni Konsehal Dionisio Basalo niadtong Agusto 28, 2008.

Ang team nirekomendar usab sa pagpahigayon og dredging ug paghimo og riprapping sa daplin sa kasapaan tungod kay giila ang Barangay Tina-an nga taas ang susceptibility sa pagbaha.

Matod ni Engr. Armando Malicse, caretaker sa MGB 7 ug hepe sa Mine Safety, Environment and Social Development Division, nga dili makiangayon nga pasanginlan sila nga nagpasagad sa trabaho.

Ang MGB nipakita og daghang dokumento sa Superbalita Cebu sa pagmatuod niini.

SISYON SA PB

Highlight sa out of town session sa Cebu Provincial Board (PB) sa Cordova kagahapon ang nahitabong trahedya sa Barangay Tina-an, dakbayan sa Naga diin mga opisyal sa Naga, environmental officers, APO Cemex representative ug uban pa ang ipatawag sa sunod sisyon.

Nauyonan usab ang financial assistance sa matag casualty nga P10,000 ug P1 milyon alang sa search, rescue ug retrieval operations sa landslide site sa Naga.