37 nasikop sa MCPO drug operations

Usa ka 41-anyos nga taga lungsod sa Consolacion ang nasikop sa kapulisan sa Centro Police Station niadtong (MCPO) Dominggo sa buntag sa buy-bust operation sa Mantawi drive, Barangay Guizo, dakbayan sa Mandaue.

Nikabat na tanan og 37 ang nadakpan sa MCPO sukad niadtong Biyernes.

Ulahing nasikop giila nga si Angelo Yuson, residente sa barangay Tayud, Consolacion, minyo, kinsa giila sa MCPO bag-ong drug player.

Matud ni Police Chief Inspector Aldrin Villacampa, hepe sa Centro Police Station nga ang gihimong buy bust operationbatok kang Yuson, usa ka follow-up operation, human nga lakip kini sa matudlo sa mga nangaging dinakpan sa maong police station nga maoy ilang gikwaan sa drugas.

Dugang ni Villacampa nga gitug-an ni Yuson nga sa barangay Tisa sa syudad sa Sugbo giingong gikan ang iyang suplay ug sa Mantawi drive ang iyang distribusyon.

Nakuha gikan kaniya ang usa ka medium pack ug napu ka mga gagamay’ng pinakete sa gidudahang shabu.

Si Yuson, usa lang sa 24 ka drug personalities nga nasikop sa nagkadaiyang stations sa MCPO sukad Byernes sa gabii hangtud Dominggo sa gabii, lakip na niini ang 13 ka mga nasikop usab sa police station 1 niadtong Sabado sa gabii atol sa checkpoint operation.

Diin dul-an sa P150 mil nga balor sa gituohang shabu ang nangasakmit sa kapulisan.

Ang 24 ang gipasakaan na og kasong paghupot opagpamaligya og ginadiling drugas kagahapon.

Samtang laing 10 usab ka mga tawo ang nasikop sa MCPO tungod sa ilegal gambling.