UV-USPF REMATCH KARONG GABII
Mga duwa karon
5:15 pm- CITU
batok USC (college) 6:45 pm- UV
batok USPF (college) Ilugan sa defending champions University of the Visayas (UV) Green Lancers ug University of Southern Philippines Foundation (USPF) Panthers ang ikatulong luna sa ilang panagtagbo sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Ang duha ka mga kampo kasamtangang nagbahin og puwesto nga pulos adunay 5-3 nga rekord diin nagsunod sila sa University of San Jose Recoletos (USJ-R) Jaguars (5-2) ug league-leader University of Cebu (UC) Webmasters (7-0).
Ning higayuna nga nagkaduol na ang tumoy sa double-round elimination, ang tanang teams seguradong mopagawas sa tanan nilang ikabuga alang sa inilugay sa upat ka mga puwesto sa playoffs.
Ang Green Lancers ni coach Gary Cortes ug Panthers ni coach Alan Cabatingan managlahi og mga naagian.
Ang Green Lancers nakasinati sa labing ngil-ad nilang sinugdanan sa torneyo ug nakasinati kini’g kapildihan sa nag-una nilang duha ka mga tahas.
Hinuon sa pagpadayon sa torneyo, hinayhinay na nga nakabawi ang Green Lancers ug nakapatong kini sa ilang kasamtangang nahimutangan.
Sa ilang bahin, ang Panthers nakasinati sa labing maayo nilang sinugdanan ug ningdaog kini sa nag-una nilang tulo ka mga duwa apan hinayhinay nga ningbugnaw ang ilang kainit.
Ang Panthers gikan sa 61-64 nga kapildihan batok sa usa sa teams nga nagkaguliyang nga mao ang Southwestern University (SWU) Cobras niadto lang Dominggo.
Apan bisan pa niini, gilaumang taas gihapon ang moral sa Panthers gumikan kay ilaha mang nasurpresa ang Green Lancers, 81-80, niadtong Agusto 30. Sa kasaysayan, mao kini ang labing unang higayon nga nakadaog ang Panthers batok sa Green Lancers.
Labing seguro, ang Green Lancers naglungotlungot nga makabawos sa Panthers ning higayuna.
Sama sa naandan, ang Green Lancers magsalig og maayo nila ni Rey Suerte, kanhi MVP, Joseu Segumpan, Sheldon Gahi, Gileant Delator, ug import Bassieru Sackor.
Samtang ang Panthers mosandig sa abilidad nila ni Karl Langahin, Alje Mendez, Rany Sarahina, Cris Dominic, Roy Quiachon ug import Rich Managor.
Sa premirong duwa, magsangka ang parehonbg nagkagidlay nga University of San Carlos (USC) Warriors ug Cebu Institute of Technology University (CITU) Wildcats.
Ang Warriors adunay 2-5 nga rekord samtang ang Wildcats wala pa’y daog sulod sa pito ka mga duwa.
Sa premiro nilang sangka niadtong Agusto 28, wala’y kaluoyng gipanglubong nga buhi sa Warriors ang Wildcats, 102-55.