‘KILLER’ SA HAPONESA NASIKOP

BABAYE TSAMBANG NADAKPAN SA BUY BUST; UYAB NGA ‘GUNMAN’ WA PA MADAKPI

■HILAK SA AMAHAN. Mipatulo sa iyang mga luha si Dennis Pansoy (ubos) human makaplagi ang iyang asawa nga si Cheryl ug paglabay sa pipila ka oras, naugkat usab sa Philippine Coast Guard rescue personnel ang lawas sa ilang anak nga si Kyle, 12, ilawom sa yuta sa sityo Sindulan, Dakbayan sa Naga niadtong Huwebes sa hapon. Hangtod kagahapon sa hapon, mokabat na sa 59 ka mga lawas ang naugkat. Taliwa ning tanan, ang nasudnong kagamhanan mopabarog og 300 kapin sa condo type housing units sa Dakbayan sa Naga.

Usa sa mga suspek sa pag ambush patay sa negosyanteng Haponesa niadtong Agusto 24 sa gabii sa Natalio Bacalso avenue sa siyudad sa Sugbo nasikop sa buy bust operation sa Mambaling ug Punta Princesa police station.

Kini giiingong niangkon nga sila ang naghimo sa krimen.

Niadtong Biyernes sa gabii, nasikop sa hiniusang pwersa sa Mambaling ug Punta Princesa police station ang mag agaw nga silang Mary Jane Gomez Aguilar, 27, ug Alfie Atillo Fernandez, 25, pulos taga sitio Mohon 2, Filter Site, Barangay Tisa, siyudad sa Sugbo.

Nakuha gikan kanila ang mga pinakete sa illegal nga drugas nga motimbang og 5.6 gramos nga gibana-bana nga mobalor ang tanan og P66,000.

Matod ni Chief Insp. Randy Caballes, hepe sa Mambaling police station, nga tulo ka mga semana nilang gipanid-an si Aguilar human nilutaw ang iyang ngan nga mamaligya sa illegal nga drugas sa ilang area.

Giingong naglisod sila sa pag- negotiate kang Aguilar tungod kay magbalhinbalhin og lugar kon adunay gustong mopalit kaniyag dinagko nga supply sa illegal nga drugas.

Sakop matod pa sa usa ka drug group si Aguilar.

Adunay ngalan nga gihatag ang dinakpan nga maoy sunod nilang target sa anti drug operation.

“Dako ni siya, Sir, kay naay one time nga mo deliver siyag 20 grams sa usa ka transaction, naglisod mi pagdakop ani niya kay usahay moingon siya nga sa Danao sila mag binayranay pero nakadawat mig info nga naa ra siya sa Tisa mao tong mi coordinate mi sa Punta Princesa police station,” matod ni Caballes.

Matod ni Sr. Supt. Royina Garma, hepe sa Cebu City Police Office, nga atol sa imbestigasyon, niangkon si Aguilar nga ang iyang hinigugma ang ni-ambush patay kang Junko Hamada, 71, sa N. Bacalso avenue.

Wa lang una nganli ni Garma kinsa ang hinigugma ni Aguilar samtang nagpadayon pa ang ilang imbestigasyon.

Giingong gisugo sila sa bana ni Hamada nga patyon kini sa wa pa matino nga hinungdan.

Ang ig-agaw ni Aguilar nga si Fernandez nitug-an usab sa kapulisan nga nakadungog siya sa panag estorya sa cellular phone sa uyab ni Aguilar ug sa Hapon nga bana sa biktima.

Tungod niini, gamiton sa kapulisan nga saksi si Fernandez sa maong kaso.

Unang gitawgan sa Hapon si Aguilar nga giingong adunay relasyon ang duha ug human magkasinabot, iya kining gipasa sa hinigugma niini nga maoy trigger man.

“Inamin ng babae na si Aguilar na kasama siya sa pag ambush kay Junko Hamaba. Siya yung back rider at yung cousin na si Fernandez narinig niya yung conversation sa telepono kaya magiging witness natin sya,” pasabot ni Garma.

Bangi sa negosyo ang usa sa gidudahan sa kapulisan nganong gipapatay sa bana si Hamada, apan ila pang palawman ang himuon nga imbestigasyon.

Si Hamada maoy tag-iya sa Beams Philippine Export Corporation nga naa nahimutang sa syudad sa Talisay.

Wa lang una gibutyag ni Garma ang ngan sa bana sa biktima nga maoy mastermind sa pag ambush samtang wa pa nila mapasaka ang kaso. /