Gilubong buhi, naa pa kahay buhi?

Gikinahanglang adunay manubag sa nahitabong landslide sa siyudad sa Naga, Sugbo nga miresulta sa kamatayon sa daghang tawo.

Samtang nagpadayon ang search and retrieval operations, nag-iyahay na sa pagpanghunaw ang mga kanahan sa mga nagkadaiyang ahensya sa kagamhanan.

Kon pwede pa lang nga maoy atong ilubong buhi ang mga opisyal sa Naga, Mines and Geo-Sciences Bureau (MGB) , Department of Environment and Natural Resources (DENR) ug quarry operators atong ipuli sa mga nangamatay.

Nagtudturay naman gud sila karon sa kamatayon sa mosobra sa usa ka gatos ka mga tawo kon atong iapil ang wapa igkita.

Pagka way mga batasan! Matod pa sa mga naglagot nga katawhan pagka maayong kalagon sa mga kalag sa mga namatay.

HUKOM SA GOBERNADOR

Angayan lang nga temporaryong gipahunong ni Gobernador Junjun Davide, ang quarry operation tungod sa nahitabong landslide sa dakbayan sa Naga.

Kini kaayuhan man sa tanan ug dili ang tuyo aron sa pag apeke sa operators. Para sa kasiguroan ug kalawasan sa kinabuhi sa katawhan.

Ang kalamidad mahimong malikayan kon ang tawo ra sab ang makaingon niini.Sama sa pagka gusbat sa atong kabukiran nagumikan sa illegal logging, quarry operations ug uban pa.

Sa akong tan-aw nakit-an ni Davide ang solusyon sa problema . Mao nga gikinahanglan ang pagtinabangay pinaagi sa pagprotehir sa kalikupan.

Ang pagbangis sa kinaiyahan maoy paninawos sa pagpanamastamas sa katawhan ngadto kanila.

Ang nagusbat nga panagway sa kabukiran sa Naga, nga mikalas ug dul-an sa gatusan ka mga tawo di na kita gusto nga mahitabo.

Mao sab kini ang nakita ni Davide, nga kon mahimo lang wala nay kinabuhi nga makalas kon duna man gayoy kalamidad nga mahitabo.

Sa pagkakaron padayon pang gipangita ang wapa makit-i. Kalooy sa pamilya sa mga biktima kay gamay nalang ang kahigayunan nga ang pabiling missing buhi pa hangtud karon.

PAGPUYO SA BUNGTUD

Usa kini sa mga hinungdan nganong daghan kanato ang dili ganahan mopuyo ug mga subdivision nga anaa sa tumoy ug sa tiilan sa bukid.

Ang global warming nagumikan sa climate change usa sa mga nakita sa mga kalamidad nga wala nato damha.

Pagsigi og uwan maoy makapahumok sa yuta nga moresulta sa landslide sama sa nahitabo sa Naga. Ang wa mahitabo kaniadto nahitabo na karong mga panahuna.